99 prósent Íslendinga á aldrinum 16-74 ára nota internetið og eiga því heimsmet í netnotkun. Þetta kemur fram í tölum Eurostat og tölum frá ITU. Mbl.is og DV.is greina frá.
Samkvæmt tölum Eurostat koma Danir fast á hæla Íslendinga með 98 prósent netnotkun. 91 prósent Íslendinga á þessum aldri nota samfélagsmiðla á netinu en einungis 56 prósent íbúa landa í Evrópusambandinu gera það. 95 prósent Íslendinga nota auk þess netið til að nota tölvupóst, 94 prósent til að nota bankaþjónustu og 81 prósent til að hlusta á tónlist. Eru þetta mun hærri tölur en í öðrum Evrópulöndum.
Í viðtali við Morgunblaðið segir Þorbjörn Broddason, professor emeritus við félags- og mannvísindadeild HÍ að takmörkuð stéttaskipting, velmegun íslensks samfélags og nýjungagirni séu á meðal ástæðna þess að Ísland er enn það land í Evrópu sem notar netið mest. „Það verður ekki kveðið nógu sterkt að orði um þær félagslegu og menningarlegu breytingar sem hafa orðið á síðustu tveimur áratugum vegna veraldarvefjarins,“ segir Þorbjörn.
„Jafnvel þó að við megum sannarlega ekki loka augunum fyrir mismunandi efnahag fólks, það eru hlutir sem þarf sannarlega að taka á, þá er tiltölulega lítill þjóðfélagslegur og fjárhagslegur munur innanlands. Það held ég að hafi áhrif á að nýmæli breiðast út í öllum hópum,“ segir Þorbjörn einnig.
