Blaðamaðurinn Heimir Hannesson tekur á algengum mýtum er varða sveitarstjórnarkosningar í pistli sem birtist í DV um helgina.
„Sumum finnst sveitarstjórnarkosningar leiðinlegar. Er því gjarnan, af þeim sömu, haldið fram að þær skipti minna máli en kosningar til þings, enda minni glamúr yfir rekstri leikskóla en skipan sendiherra, ráðherrafunda, og átaka í beinni útsendingu í ræðustól Alþingis.
Þá er því gjarnan fleygt fram að hin hefðbundna hægri vinstri skipting stjórnmálanna eigi síður við þar. Enn aðrir leggja það til að á sveitarstjórnarstigið þvælast helst þeir sem vilja stökkpall inn í alvöru pólitík og því síður mikilvægt að fá í sveitar-, bæjar- og borgarstjórn fólk af viti.“ segir Heimir, sem bætir við „Þetta að allt argasta þvæla“ og býðst til að útskýra hvers vegna.
Heimir segir að sveitarstjórnarstigið sé talsvert nær okkur, og þar séu teknar ákvarðanir sem hafi mest áhrif á okkur sem fyrst.
„Stýrivaxtahækkanir, lög um búvörur og landbúnaðarstyrki, breytingar á hegningarlögum, fjarskiptalögum eða ákvarðanir um lántöku eða niðurgreiðslur lána hins opinbera eru mikilvægar ákvarðanir. En það eru abstrakt ákvarðanir. Macro ákvarðanir. Ákvarðanir sem hafa áhrif á andlits- og einkennalausan massa og oft eftir mörg ár eða áratugi.“ Segir Heimir sem bendir á hvernig ákvarðanir í sveitastjórn hafa áhrif strax.
„Ákvarðanir teknar í ráðhúsum landsins í dag snerta hins vegar þegnana með beinum hætti á morgun. Fjölgun leikskólaplássa, rekstur bókasafna, opnunartímar sundlauga. Kannski er yfir þeim málum minni glamúr, en þiggjandi þjónustunnar, massinn, er ekki lengur andlitslaus. Það þykir mér heillandi.“
Þá fjallar Heimir um hægri og vinstri-stjórnspekina og hvernig hún birtist í sveitastjórnarpólitík.
„Í öðru lagi eru ákvarðanir sem teknar eru á sveitarstjórnarstiginu alls ekki yfir (eða undir) hefðbundna flokkspólitík hafin. Þar fer fram heilmikil umræða um hina hefðbundnu hægri vinstri stjórnspeki. Er rekstur sjúkrastofnana, leikskóla eða tónlistarskóla best borgið í höndum einkaaðila, eða ekki? Hjallastefnan góð eða slæm? Sundabraut í einkaframkvæmd? Mörgum þykir hægri vinstri pólitíkin úrelt. Þau vita ekki um hvað þau eru að tala.
Þó er það auðvitað þannig að það er ekkert hægri/vinstri við að vilja flugvöllinn burt í borginni, nýjan sparkvöll á Egilsstöðum eða lengja hafnarbakkann á Ísafirði. En í gegnum flokkakerfið fá kjósendur þó tækifæri til þess að kjósa um þau mál með beinum eða óbeinum hætti. Þyki einhverjum það púkó er þeim sömu frjálst að sitja heima á kjördag. Þeirra verður ekki saknað.“
Í lok pistils síns segir Heimir að mýtan um að sveitastjórnarpólitík sé stökkpallur í landsmálin sé dauð. Hann bendir á að í prófkjörum margra stærstu flokkanna í síðustu kosningum hafi fáir komið af sveitarstjórnarstiginu.
„Nýstirni Samfylkingarinnar komu úr banka annars vegar og úr fjölmiðlum hins vegar. Nýir Sjálfstæðismenn voru svo til allir lögmenn að uppruna, eins og reyndar oft áður.
Dagur er búinn að vera í borgarstjórn síðan áður en ég mátti keyra bíl. Nú tíni ég gráu hárin úr írska skegginu um helgar
Engar vísbendingar eru þannig lengur um að sveitarstjórnir sé útungunarstöð framtíðar „alvöru“ pólitíkusa. “
Heimir líkur pistli sínum á eftirfarandi orðum:
„Á sveitarstjórnarstiginu á sér stað, í stuttu máli, þrælskemmtileg, áhugaverð og vanmetin pólitík sem ég vona að sem allra flestir gefi góðan gaum í vor. Þar eru raunveruleg tækifæri til þess að hafa raunveruleg áhrif á sitt allra næsta umhverfi, strax.“
