ísland hefur hrapað niður lista yfir heilbrigðiskerfi í Evrópu. Ísland sem var árin 2009 og 2012 með 3ja besta heilbrigðiskerfiEevrópuþjóða hefur fallið niður um fimm sæti, var í 8. sæti í fyrra.
Þetta kom fram í þingræðu Ólínu Þorvarðardóttur, Samfylkingu, sem ræddi þessa staðreynd í óundirbúnum fyrirspurnum á Alþingi í dag. Hún sagði eftirrtektarvert að á fyrstu árum eftir hrun hefði Ísland staðist alþjóðlegt mat á áhættuþáttum s.s. aðgengi að lyfjum, biðtíma eftir þjónustu og kostnaði sjúklinga með prýði. Nú á yfirstandandi kjörtímabili þegar hagtölur væru góðar, afgangur á rekstri ríkissjóðs, félli landið niður þennan lista. Ólína vildi vita hvaða skýringar heilbrigðisráðherra, Kristján Þór Júlíusson, hefði á þessari öfugþróun.
Heilbrigðisráðherra kenndi í svari sínu því um að alþekkt væri að áhrif af efnahagskreppu kæmi ekki strax fram. Sem dæmi hefði verið ákveðið að innleiða engin ný lyf skömmu eftir hrun. Með sama hætti hlyti biðtími eftir þjónustu að lengjast í kjölfar efnahagsáfalls, að ekki væri talað um verkföll síðasta árs. \"Við erum að vinna okkur út úr þessu og munum kynna betur innan skamms tíma hvaða frekari úrbætur verða gerðar,\" sagði Kristján Þór heilbrigðisráðherra.
Ólína kom þá aftur í pontu og sagði að svar ráðherra lofaði ekki góðu. Kreppunni væri nú í góðærinu kennt um hvernig komið væri fyrir heilbrigðisþjónustu.
Eina lausnin sem ráðherra boðaði væri annars vegar niðurskurður og sparnaður en hins vegar frekari einkavæðing heilsugæslunnar. Framlög til heilsugæslu á höfuðborgarsvæðinu væru þó lægri nú en árið 2008. Aumt væri upp á að horfa að ráðherrann hefði engin svör, han hefði enga áætlun að bjóða þinginu, ekkert væri nýtt lagt fram nema stóraukin einkavæðing. Af þeim sökum hefðu 82.000 manns skorað á ráðherra að endurreisa heilbrigðiskerfið.
Blóðugt óréttlæti krabbameinsveikra
Heilbrigðisráðherra var einnig krafinn í dag um svör vegna þeirrar staðreyndar að krabbameinssjúkir þurfa nú að greiða hundruð þúsunda úr eigin vasa vegna lyfja og læknisþjónustu, ólíkt því sem tíðkast í nágrannalöndum. Björt Ólafsdóttir, BF, spurði ráðherra hvernig stæði á því að þverpólitísk nefnd undir forystu Péturs Blöndal heitins hefði skilað af sér tillögum til að minnka kostnaðarþáttöku sjúklinga og jafna hana fyrir heilu ári. Enn hefði Kristján Þór ekkert frumvarp lagt fram til að útrýma þessu óréttlæti. Samt hafi tillögur nefndarinnar sem allir flokkar hefðu samþykkt ekki kostað ríkissjóð neitt, engin aukaútgjöld heldur hafi vinnan snúist um jöfnun kostnaðar. \"Hvenær fáum við frumvarp sem jafnar kostnaðarþátttöku svo sérstaklega krabbameinssjúklingar greiði ekki þessar háu upphæðir ofan á annað,\" spurði Björt.
Kristján Þór svaraði að að mjög væri nú að styttast í frumvarp um þessi mál. Ein ástæða þess að frumvarpið hefði dregist væri róttæk uppstokkun sem gera yrði á ógegnsæju og flóknu kerfi.
Sérstaklega var rædd í þinginu saga konunnar sem Hringbraut sagði frá nýverið sem þurfti þrátt fyrir örorkuafslátt að greiða hundruð þúsunda í kostnað eftir að hún greindist með krabbamein, einstæð kona með þrjú börn.
