Lögmaðurinn Haukur Örn Birgisson gerir góðlátlegt grín að áhrifavöldum í Bakþönkum Fréttablaðsins í dag. Eins og hann bendir réttilega á eru Íslendingar mjög sólgnir í fréttir af fræga og fallega fólkinu sem svo oft er skrifað um í fjölmiðlum.
„Þúsundum saman smellum við á fyrirsagnir sem teyma okkur áfram á marineraðar ljósmyndir af frægu fólki, sem fæst er frægt fyrir nokkuð annað en að vera frægt. Enginn veit af hverju og fáir geta bent á atvik í sínu lífi þar sem þetta fólk hafi áhrif á sig. Við stöndumst hins vegar ekki freistinguna af því að fylgjast með áhrifalausu fólki hafa einhver undarleg áhrif,“ skrifar Haukur.
Hann segist þó hafa tekið eftir því að áhrifavaldarnir séu margir hverjir farnir að eyða tíma sínum saman um helgar og svo virðist sem þau hafi hreinlega stofnað eitthvert félag.
„Hver í sínu lagi birta stjörnurnar myndir frá sama staðnum, sama partíinu, sama útsýninu, jafnvel sama fólkinu. Með myndunum birtast þó engin skilaboð – bara ljósmynd af þeim, horfandi alvörugefin og heimspekileg hvert í sína áttina, eitthvert út í tómið. Það virðist alveg bannað að horfa beint í myndavélina.“
Haukur segist þó vera búinn að sætta sig við það að aldrei muni birtast mynd af honum og því hvað hann gerði um helgina í fjölmiðlum.
„Það hefur enginn áhuga á þannig mynd, enda er ég með öllu áhrifalaus. Ekki einu sinni börnin mín hlusta á það sem ég hef að segja. Eini sénsinn minn til þess að fá 100 læk á Facebook er að birta krúttlega mynd af krökkunum eða tagga hálfan vinahópinn. En öll verðum við að byrja einhvers staðar. Ég minni á að Jesús var bara með 12 fylgjendur í upphafi,“ skrifar hann.
Eru lesendur sammála Hauki um að áhrifavaldar séu áhrifalaust fólk? Eða er hann kannski bara smá afbrýðisamur sjálfur?
