Útlit er fyrir að herrans árið 2015 verði ár mesta brottflutnings íslenskra ríkisborgara úr landi - og er þar brotið í blað í sögu búferlaflutninga, því þessi mikli landflótti er ekki bundin kreppueinkennum í efnahag eins og jafnan áður þegar Íslendingar hafa flutt í ríkum mæli úr landi.
Þetta kemur fram í yfirgripsmikilli úttekt Morgunblaðsins í dag á búferlaflutningum, en þar segir að flutningsjöfnuður hafi einungis verið neikvæðari í fimm ár frá 1961 og þá ávallt verið tengdur samdráttarskeiði til sjós og lands.
Fram kemur í blaðinu að 3,120 íslenskir ríkisborgarar hafi flutt frá landinu fyrstu níu mánuði ársins, eða um 1,130 fleiri en fluttu til landsins á tímabilinu. Þetta er mesti fólksflutningur úr landi frá því árið 2011.
Samtals hafa 8,342 Íslendingar flutt út frá 2009 umfram aðflutta.
\"Þetta eru ekki kreppuflutningar. Það er eitthvað djúpstæðara á ferðinni núna,\" segir Ásgeir Jónsson, dósent í hagfræði við Háskóla Íslands, en hann segir vísbendingar vera um að margt háskólafólk flytji nú úr landi: \"Það er auðsætt af atvinnuleysistölum,\" segir hann í blaðinu \"að batinn á vinnumarkaði hefur ekki skilað sér til menntaðs fólks nema að takmörkuðu leyti,\" og hans tilgáta er þessi: \"Neikvæður flutningsjöfnuður á tímum hverfandi atvinnuleysis kann að gefa til kynna að vel launuðu störf skorti fyrir menntað fólk.\"
Hann telur mögulegt að of mikill launajöfnuður sé orðinn vandamál þegar kemur að því að halda ungu fólki í landinu.
