Í sumar varð Haraldur Johannessen uppvís að því að nota embætti ríkislögreglustjóra til að kvarta yfir bók og sjónvarpsþætti. Það gerði hann með því að senda bréf þann 2. mars 2018, með bréfsefni embættis ríkislögreglustjóra, til sagnfræðingsins og þáttastjórnandans Björns Jóns Bragasonar vegna bókarinnar Gjaldeyriseftirlitið – vald án eftirlits?, en hún kom út árið 2016. Haraldur sendi einnig bréf á sjónvarpsmanninn Sigurðar Kolbeinssonar vegna sjónvarpsþáttar um sama efni sem sýndur var árið 2017. Björn Jón hefur einnig sagt að Haraldur hafi hringt í sig persónulega og sagst vera að íhuga að stefna honum fyrir meiðyrði.
Ástæða bréfa Haraldar til Björns og Sigurðar var lýsing Valtýs Sigurðssonar, þáverandi ríkissaksaksóknara, á fundi í innanríkisráðuneytinu árið 2011 þar sem hann hefði lagt fram minnisblað þar sem fram kom það mat að efnahagsbrotadeild ríkislögreglustjóra „hafi um árabil skort faglega yfirstjórn og metnað“.
Í bréfi Haraldar til tvímenningana er haldið því fram að frásögn, bæði í bókinni og sjónvarpsþættinum, væri markleysa og þeir bæru ábyrgð á ólögmætri meingerð.
Björn Jón og Sigurður kvörtuðu yfir háttsemi Haraldar til Umboðsmanns Alþingis, sem komst síðar að því að efni og framsetning bréfanna hefðu verið ámælisverð og til þess fallin að rýra traust og trú á embætti ríkislögreglustjóra. Dómsmálaráðuneytið gerði auk þess alvarlegar athugasemdir við framgöngu Haraldar.
Í svari dómsmálaráðuneytisins, sem barst umboðsmanni Alþingis í dag og Hringbraut hefur undir höndum, kemur fram að ráðuneytið muni ekki áminna Harald vegna bréfasendingana. Þar kemur fram að þar sem Haraldur hafi gengist við misgjörðum sínum og sagst ætla að gæta að orðanotkun sinni í framtíðinni í málum sem þessum.
„Var það mat m.a. byggt á því að hann gekkst við misgjörðum sínum og áréttaði það til framtíðar að hann myndi gæta að orðanotkun í málum sem þessum. Í ljósi þess var ákveðið að gefa honum þó skýr skilaboð um afstöðu ráðuneytisins til slíkrar framgöngu og leggja sérstaklega fyrir hann að leiðrétta hana. Það voru því meðalhófssjónarmið sem réðu för við þetta mat.“
Þá kemur einnig fram í svari dómsmálaráðuneytisins að Haraldur hafi ekki gert sér grein fyrir því að skaðabótalög gætu ekki átt við opinber embætti, heldur eingöngu einstaklinga.
„Af svörum ríkislögreglustjóra til ráðuneytisins mátti ráða að hann hafi ekki gert sér grein fyrir þessum þætti málsins og því einfaldlega ekki áttað sig á því að hægt væri að túlka bréf hans á þann hátt enda hafi hann ítrekað komið þeim skýringum áleiðis að hann hafi verið að kom á framfari leiðréttingum vegna umfjöllunar um embættið.“
Dómsmálaráðuneytið tekur samt fram að það líti það alvarlegum augum að ríkislögreglustjóri sendi bréf með fullyrðingum um ólögmæta háttsemi þeirra. En ekkert er til staðar sem bendir til þess að skrif Björns Jóns hafi verið ólögmæt.
