Haraldur Benediktsson, þingmaður Sjálfstæðisflokksins og fyrrum formaður Bændasamtakanna, segir enga ástæðu til að ríkið eigi fjölda jarða en þær eru um 450 talsins. 150 þeirra er í umsjá ýmissa ríkisstofnanna en um 300 eru hefðbundnar bújarðir víða um land. Ríkið er því stærsti eigandi bújarða hér á landi.
Þetta kemur fram í Fréttablaðinu í dag. Þar segir að flestar þessara jarða séu í ábúð og séu leigðar út en sumar séu í eyði. Haraldur vill láta gera skipulagt átak í sölu þessara jarða. Núverandi ástand skapi óvissu fyrir leigjendur og að það sé enginn ávinningur af því fyrir ríkið að eiga þær flestar. Ríkið eigi aðeins að halda eftir jörðum sem hafi sérstöðu vegna náttúrufars eða sögu og nú þegar sé til nokkuð góð flokkun á þeim.
Flestar jarðirnar eru úr hinum gamla jarðasjóði sem var notaður til að kaupa jarðir bænda sem lentu í erfiðleikum. Sjóðurinn keypti fjölda jarða á níunda og tíunda áratugnum og þurfti oft að leggja honum til fé úr ríkissjóði.
Fréttablaðið hefur eftir Haraldi að leigutakar hafi um hríð viljað kaupa jarðirnar sem þeir leigja. Fyrsta skrefið eigi að vera að reyna að semja við þá um kaup. Þá geti þeir öðlast einhverja framtíðarsýn um hvernig sé hægt að framkvæma á jörðunum. Búskapur sé staðnaður á nokkrum jörðum því engin svör fáist frá ríkinu.
Jarðirnar sem um ræðir eru af ýmsum stærðum og gerðum. Ekki liggja fyrir tölur um heildarverðmæti þeirra en Haraldur telur að meðalverð þeirra sé um 20 milljónir og heildarverðmætið því um sex milljarðar. Hann segist ekki tala fyrir því að jarðirnar verði seldar á gjafverði en ekki megi halda að þetta séu mjög verðmiklar eignir.
