Rithöfundurinn Halldór Armand greindist með Covid nú á dögunum. Halldóri leiðist þó greinilega ekki í einangruninni og sló hann á létta strengi í myndbandi sem hann birti á Twitter. Halldór segir Þórólf Guðnason, sóttvarnalækni, hafa hringt sérstaklega í sig til að tilkynna honum nokkuð merkilegar fréttir.
„Ég er heima með Covid og mig langaði að deila því með ykkur að Þórólfur sóttvarnalæknir hringdi í mig persónulega í morgun,“ segir Halldór.
Hann segir Þórólf hafa hringt í sig þar sem hann var staddur í bíl ásamt Víði Reynissyni, yfirlögregluþjóni almannavarna, og Ölmu Möller, landlækni, og hefur eftir sóttvarnalækni:
„Halldór, við í þríeykinu, okkur liggur bara hugur á að vita, og við erum búin að ræða þetta hérna fram og til baka og við urðum bara að hringja í þig. Þetta er auðvitað ríkisleyndarmál og fer ekkert lengra. En við verðum bara að fá að vita, hvernig er það eiginlega að vera svona mikill king?“
Heima með covid. Þríeykið hringdi persónulega í mig á speaker því ég greindist með sérstakt „veisluafbrigði" sem kallast á fræðimáli Covid Royal. Víst bara útvaldir kings sem fá það. Fjalla um þetta hér. pic.twitter.com/qKzAwm42jO
— Halldór Armand (@HalldorArmand) February 12, 2022
Þríeykið góðkunna var þá að sögn Halldórs samankomið til að tilkynna honum að hann hafi greinst með glænýtt afbrigði veirunnar skæðu, svokallað veisluafbrigði.
„Þetta heitir sem sagt á fræðimálinu Covid Royal og þykir vera svona konunglegasta afbrigðið af veirunni til þessa. Og við áttum svo bara mjög fínt spjall um þetta og þau spurðu mig út í einkennin og líðanina og ég náttúrlega bara sagði þeim sannleikann, að það er bara algjör veisla að vera svona mikill king,“ segir Halldór glettinn.
Hann segir Þórólf hafa orðið ábúðarfullan undir lok samtalsins og viljað ítreka við hann nokkuð þegar Halldór stoppaði sóttvarnalækninn af.
„Og þá sagði ég „Þórólfur minn, ég ætla að stoppa þig hér, ég veit hvað þú ert að fara að segja. Miklu valdi fylgir mikil ábyrgð, ég veit þetta, og ég tek því ekki af léttúð að vera svona mikill king.“
