Halla Tómasdóttir frumkvöðull og fjárfestir býður sig fram til embættis forseta Íslands. Þetta tilkynnti hún á blaðamannafundi á heimili sínu í Kópavogi á fjórða tímanum í dag.
Í tilkynningu um framboð Höllu kemur fram að hundruð manna hafi þrýst á Höllu að gefa kost á sér til embættis forseta Íslands og eru kostir hennar tíundaðir á fésbók framboðsins, en þar er Halla sögð hafa til að bera bjartsýni, áræðni og kjark, allt saman eiginleika \"sem við þurfum á að halda til að takast á við nútímann og framtíðina,“ eins og segir þar.
Að því er fram kemur á sömu síðu er Halla uppalin á Kársnesinu í Kópavogi, þar sem hún býr nú með eiginmanni sínum, Birni Skúlasyni. Björn er viðskiptafræðingur og rekur verslun Nóatúns í Austurveri og eiga þau saman tvö börn.
Þá segir einnig að Halla sé ættuð af Ströndum þar sem móðir hennar, Kristjana Sigurðardóttir, þroskaþjálfi ólst upp, og úr Skagafirði þar sem faðir hennar, Tómas Björn Þórhallsson, pípulagningameistari og síðar húsvörður við Sunnuhlíð er alinn upp.
Halla var skiptinemi í Bandaríkjunum og bjó þar í tíu ár. Þá lærði hún viðskiptafræði með áherslu á stjórnun og mannauðsmál og lauk alþjóðlegri MBA gráðu með áherslu á alþjóðleg samskipti og tungumál.
