Undirskriftum Sjálfstæðismanna sem krefjast atkvæðagreiðslu um þriðja orkupakkann verður ekki skilað áður en Alþingi greiðir atkvæði um málið þann 2. september næstkomandi. Jón Kári Jónsson, formaður félags Sjálfstæðismanna í Hlíða- og Holtahverfi í Reykjavík, stendur að söfnuninni og segir það ekki þjóna neinum tilgangi þar sem forysta flokksins ætli ekki að taka undirskriftirnar til greina. RÚV greinir frá.
„Með tilliti til þess sem kom fram á fundi í Valhöll, að undirskriftirnar yrðu í besta falli hafðar til hliðsjónar, þá sjáum við enga ástæðu til þess að vera að skila þessu fyrr en að málinu lýkur á Alþingi,“ segir Jón Kári við í samtali við Mbl.is.
Frá því í byrjun ágúst hefur átt sér stað undirskriftasöfnun meðal flokksbundinna sjálfstæðismanna þar sem þeir sem styðja við söfnunina krefjast þess að farið verði fram á það við miðstjórn Sjálfstæðisflokksins að fram fari atkvæðagreiðsla innan flokksins um þriðja orkupakka Evrópusambandsins.
Gefa ekki upp fjölda undirskrifta
Yfirlýst markmið söfnunarinnar er að ná 5.000 undirskriftum en Jón Kári hefur ekki viljað gefa upp hversu margar undirskriftir hafa safnast. Samkvæmt umfjöllun Mbl.is ræða Jón Kári og aðrir sem standa að undirskriftasöfnuninni nú hvenær fjöldinn verður gefinn upp.
„Ég sé enga ástæðu til að hætta undirskriftum fyrr en málið er úr sögunni. Ég veit ekki hversu margar undirskriftir þetta verða og það er ekki víst að þær nái 5.000 en það er í öllu falli talsvert aðhald fólgið í því að fá undirskriftir þúsunda flokksmanna,“ segir Jón Kári við Mbl.is.
Úr því að flokksforystan hyggst virða söfnunina að vettugi finnst honum þrátt fyrir það mikilvægt að senda henni skilaboð. „Það skiptir máli ef þúsundir flokksmanna senda þau skilaboð að þeir vilji fá að kjósa um málið,“ segir hann við RÚV.
Davíð Þorlákssyni, forstöðumanni samkeppnishæfnisviðs Samtaka atvinnulífsins og fyrrverandi formanni Sambands ungra Sjálfstæðismanna, þykir það athyglisvert að Jón Kári og félagar vilji ekki gefa upp fjölda undirskrifta.
„Menn sem kalla eftir beinu lýðræði, því niðurstaða þeirra sem við höfum kosið sem okkar fulltrúa hentar þeim ekki, safna persónuupplýsingum um fólk og neita að gefa upp hvernig það gengur. You can\t make this shit up
