Landsframleiðslan á fyrsta ársfjórðungi 2015 jókst um 2,9% borið saman við fyrsta ársfjórðung 2014. Á sama tíma jukust þjóðarútgjöld, sem eru samtala neyslu og fjárfestingar, um 9,9%.
Þetta kemur fram í frétt á vef Hagstofu Íslands þar sem segir að einkaneysla hafi aukist um 3,9% á þessum tíma, samneysla um 1,5% og fjárfesting um 23,5%. Útflutningur jókst um 2,7% en innflutningur töluvert meira, eða um 17,4%.
Árstíðaleiðrétt landsframleiðsla dróst saman um 1,5% milli fjórða ársfjórðungs 2014 og fyrsta ársfjórðungs 2015. Þar af jókst einkaneysla um 0,8%, samneysla um 0,3% og fjárfesting um 16,1%. Innflutningur jókst um 12,8% á meðan útflutningur jókst um 2,4%.
