Hagstofa Íslands hefur gefið út nýja þjóðhagsspá sem tekur til áranna 2019 til 2024. Spáð er 0,2 prósent samdrætti í ár, sem stafar að mestu af 2,5 prósent minnkun útflutnings. Hagstofan spáði síðast samdrætti árið 2010.
Þetta kemur fram í fréttatilkynningu frá Hagstofunni.
Þar segir horfur séu á að verg landsframleiðsla í ár breytist lítið að raunvirði frá fyrra ári. Á næsta ári sé gert ráð fyrir að hagkerfið vaxi um 2,6 prósent vegna bata í útflutningi og fjárfestingu. Seinni hluta spátímans er talið að hagvöxtur verði á svipuðu reiki og árið 2020.
„Spáð er 2,4% vexti einkaneyslu í ár þrátt fyrir að skammtímahagvísar gefi til kynna hægari vöxt, en á móti vegur minni óvissa í ljósi samþykktra kjarasamninga. Árið 2020 er reiknað með 2,8% aukningu einkaneyslu en á bilinu 2,5-3% árin á eftir. Vöxtur samneyslu er áætlaður um 1,9% í ár og 1,3% árið 2020 en að hann verði á bilinu 1,5-2,4% það sem eftir lifir spátímans,“ segir einnig í tilkynningunni.
Einnig kemur fram að útlit sé fyrir að fjárfestingar dragist saman um 5,4 prósent, m.a. vegna útfluttra flugvéla og skipa, en árið 2020 er talið að þær taki við sér og vaxi um 6,2 prósent. Reiknað er með rúmlega 3 prósent aukningu fjárfestinga að meðaltali árin 2021-2024.
Þá er greint frá því að framlag utanríkisviðskipta til hagvaxtar verðir neikvætt í ár og á næsta ári en lítillega jákvætt eftir það. Áætlað sé að viðskiptajöfnuður verði jákvæður um 1,2 prósent af vergri landsframleiðslu í ár en tæplega 0,7 prósent á ári það sem eftir lifir spátímans.
Um verðbólgu segir að lokum í tilkynningunni: „Útlit er fyrir að verðbólga verði 3,4% í ár og um 3,2% á næsta ári. Í kjölfar gengisveikingar á síðari hluta ársins 2018 hefur gengi krónunnar haldist nokkuð stöðugt og er gert ráð fyrir að svo verði áfram. Óvissa um launaþróun hefur minnkað eftir samþykkt kjarasamninga á almennum vinnumarkaði og ekki er gert ráð fyrir að niðurstaða þeirra hafi teljandi áhrif á verðlag umfram það sem áður var reiknað með.“
