Ýsa var það heillin, gætu sérfræðingar Hafrannsóknastofnunar hafa hugsað við síðasta leiðangur sinn við landið, en meira fékkst þar af ýsu en á síðustu árum, en magn hennar hefur minnkað nærstöðugt frá árinu 2005 til 2014.
Mikil aukning var í magni árs gamallar ýsu á öllum svæðum nema í Arnarfirði, að því er segir í tilkynningu frá Hafró í dag. Minna var af þorski í Arnarfirði og Ísafjarðardjúpi en síðustu ár, segir þar, en hins vegar jókst magn þorsks á svæðunum fyrir norðan land. Einnig var mikið af þorskseiðum. Magn ungfisks var yfir viðmiðunarmörkum.
Í leriðangrinum var ástand rækjustofnsins kannað á Vestfjörðum og í fjörðum norðanlands. Stofnvísitala rækju í Arnarfirði var undir meðallagi og var helsta útbreiðslusvæði rækju innst í firðinum. Stofnvísitala rækju í Ísafjarðardjúpi mældist undir meðallagi. Líkt og undanfarin ár var mest magn rækju innst í Djúpinu. Stofnvísitala rækju í Skjálfanda mældist rétt undir meðallagi og var hún tiltölulega jafndreifð yfir svæðið. Rækjustofnar á öðrum svæðum eru enn í lægð.
Hafrannsóknastofnun hefur lagt til að leyfðar verði veiðar á 100 tonnum af rækju í Skjálfanda, 250 tonnum í Arnarfirði og 700 tonnum í Ísafjarðardjúpi fiskveiðiárið 2015 til 2016.
