Árið 2018 kom Siðmennt að ellefu útförum. Árið 2017 kom félagið að 15 útförum. Siggeir F. Ævarsson, framkvæmdastjóri Siðmenntar, segir í samtali við Morgunblaðið að áður en Siðmennt fékk leyfi til að jarða fólk hafi lítið annað verið í boði fyrir trúlausa og vildi ekki láta jarða sig af presti. Siggeir segir að ein ástæðan fyrir fáir leiti til Siðmenntar enn sem komið er, sé vegna þess að fólk viti ekki hvað sé í boði hjá félaginu.
„Síðan er spurningin líka hvar verður útförin haldin. Ég sendi inn fyrirspurn á dómsmálaráðuneytið um daginn til að reyna að fá það á hreint hvar þessir óvígðu reitir eru. Sumum er alveg sama hvar þeir hvíla en aðrir vilja ekki sjá að það sé vígð jörð í kringum þá.“
Þá er Siðmennt ekki með húsnæði og getur því ekki boðið uppá útfarir. Þá er aðeins hluti athafnastjóra þjálfaðir til að sinna útförum. Siggeir segir: „Mín kenning er sú að ef við þjálfum fleiri athafnastjóra í þessu þá sjálfkrafa verður til betra tengslanet og þetta spyrst út.“
Annað sem spilar inn í að fáir leiti til Siðmenntar, er að félagið má ekki halda útfarir í kirkjum. Ein undantekning hefur þó verið gerð en þar sem Fossvogskirkja tilheyrir ekki neinum söfnuði hefur Siðmennt fengið þar inni. Útfarir á vegum Siðmenntar hafa einnig verið haldnar í félagsheimilum og bíósölum
„Það væri æskilegt að ríkið legði til húsnæði sem væri ekki með neinum trúartáknum, þótt það sé ekki ritað í stefnuskrá Siðmenntar að krefja ríkið um slíkt. Meira að segja í Fossvogskirkju, þar sem flestar útfarir á okkar vegum eru haldnar, eru krossar, sem stuðar suma,“ segir Siggeir og bætir við að lokum:
„Við erum örugglega ekki að fara að byggja okkar eigið húsnæði á næstunni en ég væri algjörlega fylgjandi því að ríkið myndi leggja til hlutlaust hús handa öllum. Raunar held ég að það sé löngu kominn tími til að endurskoða lög um kirkjugarða, greftrun og líkbrennslu.“
