Drífa Snædal, forseti ASÍ, segir í samtali við Morgunblaðið að ýmsar hækkanir á gjöldum sem taki gildi nú um áramótin tali beint inn í kjarasamningsviðræður sem eru framundan.
„Allar hækkanir, breytingar á gjaldskrám og hreyfingar hjá hinu opinbera sem hafa áhrif á kjör fólks tala inn í kjarasamninga. Nú bera allir ábyrgð á því að ná settum markmiðum, þ.e.a.s. að þyngja ekki róðurinn heldur létta hann fyrir tekjulægstu hópana. Fjármálaráðherra hefur lýst því yfir að það skuli stefnt að því að hækka laun þeirra lægst launuðu. Við verðum öll að róa í sömu átt“, segir Drífa.
Drífa segir að ASÍ vilji sjá frekari aðgerðir af hálfu stjórnvalda, einkum í húsnæðis- og skattamálum, og nefnir einnig að barnabætur þurfi að hækka.
Í fréttaskýringu Morgunblaðsins í dag kemur fram að meðal gjalda sem hækka um áramót eru áfengis- og tóbaksgjöld og eldsneytisgjöld. FÍB reiknar með því að bensínverð hækki um 3,3 krónur á lítra og dísilolía um 3,1 krónu á lítra í byrjun nýs árs. Hjá Reykjavíkurborg muni gjöld hækka fyrir bókasafnsskírteini og stakar sundferðir. Leikskólagjöld, fæðisgjöld og gjöld vegna þjónustu frístundaheimila munu sömuleiðis hækka.
„Almennt þarf að vinda ofan af gjaldtöku í velferðarkerfinu, hvort sem það er í heilbrigðis-, mennta-, leikskólamálum eða hverju sem er. Gjaldtaka í velferðarkerfi er í raun nefskattur og kemur niður á þeim sem hafa verstan fjárhag“, segir Drífa einnig í samtali við Morgunblaðið.
