Gylfi Arnbjörnsson, forseti Alþýðusambands Íslands segir að breyta verði skattkerfinu hér á landi svo það taki almennilega á þeim ofurlaunum sem séu aftur að verða áberandi í samfélaginu og skekki stöðuna mjög á vinnumarkaði.
„Ég held að það sé alveg klárt mál að þetta sé aftur og aftur að leiða til átaka á meðal þjóðarinnar. Þetta hafði greinilega mjög mikil áhrif á afstöðu einstakra aðildarfélaga minna í gær, fréttirnar af Landsvirkjun og bönkunum,“ segir hann við mbl.is um ofurlaunaþróunina.
Gylfi segir þar að setja ætti háan hátekjuskátt á „ofurlaun“ og nefnir að 60-65% væri allt í lagi: \"Það letur og það á að letja. Það á að letja fyrirtæki í að gera svona, en það á líka að breyta skattalögum fyrirtækja með þeim hætti að frádráttarbærni launakostnaðar þegar laun eru komin í einhverjar svona fjárhæðir eigi bara einfaldlega ekki að vera til staðar. Hluthafarnir ættu bara sjálfir að borga þetta. Það ætti að skattleggja þessi laun grimmilega.“
Útspil stjórnvalda frá því í gær opnaði á samtal ýmsar skattkerfisbreytingar sem kæmu tekjulægri hópum til góða. Meðal annars var þar rætt um mögulega hækkun persónuafsláttar, en krafa ASÍ hefur verið að persónuafsláttur hækki í samræmi við launavísitölu.
