Fyrrum fjölmiðlamaðurinn Gunnar Smári Egilsson ætlar að bjóða sig fram á lista Sósíalistaflokks Íslands í alþingiskosningunum í haust. Gunnar Smári er stofnandi og formaður framkvæmdastjórnar Sósíalistaflokksins en flokkurinn ætlar að bjóða fram lista í öllum kjördæmum.
Gunnar Smári segist hafa verið hvattur til að bjóða sig fram.
„Ég lofaði kjörnefnd því að ákveða mig um helgina og gefa þeim svarið eftir þessa helgi. Þegar ég gekk inn í salinn í dag og sá félaga mína þar þá ákvað ég með sjálfum mér að ef að félagarnir telja sig geta notað mig þá er ég alveg til í að bjóða mig fram.“
Gunnar Smári er bjartsýnn á að Sósíalistaflokkurinn komist á þing enda segir hann sósíalisma vera í tísku hjá ungu fólki.
„Flokkurinn mælist inni og er búinn að mælast inni eiginlega allt þetta ár á þingi án þess að hafa kynnt lista. Þetta eru grasrótarsamtök, þetta er ekki klofningur út frá öðrum flokkum, þetta er flokkur sem hefur orðið til út frá brýnni þörf almennings,“ segir Gunnar Smári.
Undanfarið hefur Sósíalistaflokkurinn verið að mælast með um fimm til sex prósenta fylgi í skoðanakönnunum og ætti því að ná mönnum á þing samkvæmt því.
Gunnar Smári segir það sæta tíðindum í íslenskri pólitík að stjórnmálaflokkur sem hafi enn ekki kynnt framboðslista mælist með fulltrúa á þingi. Listum verður stillt upp af sérstakri kjörnefnd en búist er við að hún ljúki störfum fyrstu vikuna í ágúst.
