Guðrún Gyða Eyþórs Árnadóttir lenti í furðulegri lífsreynslu nýverið eftir að hún byrjaði aftur á stefnumótaforritinu Tinder eftir nokkurra mánaða hlé. Í pistli á vef Mannlífssegir hún að eftir stuttan tíma hafi hún byrjað að spjalla við ágætlega útlítandi herramann á hennar aldri. Hún segist hafa passað sig á því að hafa ekki gamlar myndir af sér eða myndir með filter.
Maðurinn myndarlegi var mjög til í að hitta hana og hrósaði henni mikið fyrir útlitið.
Guðrún fór svo að undirbúa stóra veislu og daginn eftir var hún svo búin á því að hún hafði sig ekki til. „Lá eins og skata í sófanum í uppáhalds flónelspeysunni með kanínumyndum og elstu og ljótustu jogging buxum á Schengen svæðinu,“ segir hún.
Hún fór svo út í Hagkaup í gömlum strigaskóm. „Tróð kanínupeysunni ofan í joggarann og henti yfir sig regnjakka sem er svo gamall að hann er enn merktur Landssíma Íslands.“
Svo rakst hún á manninn. „Ég þekkti kauða strax af myndinni og það var augljóst að hann gerði slíkt hið sama. Ég mun aldrei, svo lengi sem ég lifi, gleyma hryllingssvipnum á manninnum þegar hann renndi augunum yfir kanínupeysuna, joggarann og blautu klessuna á hausnum á mér sem hefði mátt kalla hár á góðum degi.“
Maðurinn vildi ekkert með hana hafa eftir þetta. „Þegar heim var komið opnaði ég Tinder og samfélagsmiðla. Og sjá; öllum samskiptum hafði verið eytt og ég blokkuð í drasl. Alls staðar.“
