Utanríkisráðherrar aðildarríkja Atlantshafsbandalagsins komu saman til fundar í Washington í tilefni af 70 ára afmæli bandalagsins, en hinn 4. apríl 1949 var stofnsáttmáli Atlantshafsbandalagsins undirritaður af tólf stofnríkjum, Íslandi þar á meðal. Guðlaugur Þór Þórðarson utanríkisráðherra sótti fundinn.
Samskiptin við Rússland voru ofarlega á baugi á fundinum, þ.m.t. staða INF-samningsins um meðaldrægar kjarnaflaugar sem sagt var upp eftir ítrekuð brot Rússlands á ákvæðum samningsins. Þróun mála í Úkraínu og við Svartahaf, ekki síst eftir atburðina á Azov hafi í nóvember sl., var enn fremur til umfjöllunar og hétu bandalagsríki áframhaldandi stuðningi við Georgíu og Úkraínu.
Þetta kemur fram á vef utanríkisráðuneytisins. Þar segir að ráðherrarnir hafi jafnframt rætt baráttuna gegn hryðjuverkum og stöðuna í Afganistan og gang mála í friðarumleitunum í landinu. Þá var einnig rætt um frekari stuðning Atlantshafsbandalagsins við uppbyggingarverkefni í Írak, Jórdaníu og Túnis sem og sem og áframhaldandi þátttaka í fjölþjóðlegu bandalagi gegn ISIS hryðjuverkasamtökunum.
Í gær komu utanríkisráðherrar Atlantshafsbandalagsins saman í Andrew W. Mellon-salnum í Washington þar sem stofnsáttmáli Atlantshafsbandalagsins var undirritaður fyrir sjötíu árum. Bjarni Benediktsson þáverandi utanríkisráðherra ritaði undir samninginn fyrir Íslands hönd. Haft er eftir Guðlaugi Þór:
„Atlantshafsbandalagið er einstakt varnarbandalag ríkja sem aðhyllast sömu gildi og deila hagsmunum. Það hefur stuðlað að friði og hagsæld í Evrópu og styrkt tengslin við Norður Ameríku. Það eldist jafnframt vel og hefur þróast samhliða breyttu og sífellt flóknara öryggisumhverfi. Grunnstoð Atlantshafsbandalagsins um samstöðu, og einn fyrir alla og alla fyrir einn, er tímalaus og á jafnt við í dag og fyrir sjötíu árum. Það reyndist heillaspor hjá ungu lýðveldi að undirrita Washington sáttmálann þann 4. apríl 1949.“
