Grunur um 20 þolendur mansals í ár

Lögreglan á höfuðborgarsvæðinu hefur skilgreint um tuttugu einstaklinga sem þolendur mansals í viðræðum og athugunum þar sem grunur hefur vaknað á liðnu ári. Þar af leituðu tveir einstaklingar sjálfir til lögreglunnar vegna meints vinnumansals.

Þetta kemur fram í Fréttablaðinu í dag, en þar er haft eftir Snorra Birgissyni, rannsóknarlögreglumanni hjá Lögreglunni á höfuðborgarsvæðinu að á þessu ári hafi lögreglan fengið til sín tvo einstaklinga sem hafi óskað eftir aðstoð sem þolendur mansals, en svo þegar liðið hafi á rannsóknina hafi þeir dregið þeir ósk sína til baka: \"Við erum búin að ræða við um tuttugu manns sem við skilgreinum sem þolendur mansals á árinu vegna þess að þeir sýna öll einkenni þess en hafa ekki óskað eftir aðstoð. Slíkt er algengt og í sumum tilfellum gera þolendur sér ekki grein fyrir stöðu sinni,“ segir hann í blaðinu.

Snorri segir ástæðu til þess að hafa áhyggjur af fjölgun mansalsmála: \"Hér á landi er það fyrst og fremst aukinn fjöldi ferðamanna og erlendra verkamanna hingað til lands sem vekur áhyggjur. Hælisleitendur eru líka hópur í viðkvæmri stöðu og því þarf að hafa augun opin gagnvart slíku hér á landi.“

Að því er fram kemur í frétt blaðsins er skortur á úrræðum handa þolendum mansals. Kvennaathvarfið taki á móti kvenkyns þolendum, en Snorri bendir á að það henti ekki í þeim tilvikum sem þolandi þurfi ríka vernd: \"Kvennaathvarfið er virkilega góður staður og þar vinnur traust fagfólk, en athvarfið hentar ekki alltaf. Í sumum tilfellum þarf að færa einstaklinga út fyrir höfuðborgarsvæðið, það þarf jafnvel að færa þá út fyrir landsteinana. Við þurfum strax föst úrræði fyrir karlkynsþolendur og börn og þurfum að þróa verklag, leiðir og úrræði þegar Kvennaathvarfið hentar ekki. Þá þurfum við gott þverfaglegt náið samstarf við fagaðila í þessum málum og ég hef trú á því að það verði í náinni framtíð,“ segir lögreglumaðurinn í Fréttblaðinu í dag.