Gríska ríkisstjórnin hefur loksins fallist á skilyrði lánardrottna sinna og boða stórtækan niðurskurð á útgjöldum ríkisins til að freista þess að gera himinháar skuldir sínar sjálfbærar í framtíðinni.
Því fór eins og flestir héldu; stóru orðin um afarkosti og nánast níðingsskap lánardrottnanna hafa verið dregin til baka í 14 síðna plaggi þar sem tillögur um skattahækkanir, breytingar á lífeyriskerfinu, lækkun eftirlaunaaldurs og verulegan samdrátt í ríkisútgjöldum eru kynntar í þeirri von að gríska ríkið fái 53,5 milljarða evra lán til næstu þriggja ára sem stjórnvöld í Grikklandi telja að geti komið jafnvægi á ríkisbúskapinn. Meðal annars verða gerðar breytingar á virðisaukaskattkerfinu og í stað þess að nú sé 13% vsk á veitingastaði og veitingaþjónustu þá hækki hann í 23% en það hlutfall verður ráðandi í virðisaukaskattkerfinu eftir breytingar. Aftur á móti verði virðisaukaskattur á mat, orku og vatn 13%. Virðisaukaskattur á lyf og lækningavörur, bækur og leikhús verði 6%.
Nú er það þingsins í Aþenu að ákveða næstu skref, en fastlega er gert ráð fyrir því að gríska þingið samþykki tillögur ríkisstjórnar Alexis Tsipras um þessar róttæku umbætur í efnahagsmálum landsins þrátt fyrir andstöðu meðal þeirra sem eru lengst til vinstri í hans eigin flokki, Syriza. Fjármálaráðherrar evruríkjanna fara nú yfir tillögur Grikkja, en leiðtogar Evrópusambandsríkjanna hittast svo á sunnudag þar sem afstaða verður tekin til þeirra.
Með tillögunum er beinlínis stefnt að því að koma í veg fyrir fjármálahrun Grikklands sem gæti hæglega hrakið Grikki úr evrusamstarfinu með ófyrirsjánlegum afleiðingum fyrir land og þjóð.
Niðurskurðar- og skattatillögurnar hljóða upp á 13 milljarða evra. Það er hærri fjárhæð en gert var ráð fyrir í tillögunum sem hafnað var í þjóðaratkvæðagreiðslunni á sunnudag.
Skuldir gríska ríkisins nema 320 milljörðum evra en Grikkir hafa í tvívegis fengið neyðaraðstoð frá Evrópusambandinu og Alþjóðagjaldeyrissjóðnum, samtals 240 milljarða evra. Þá voru 107 milljarða evra skuldir Grikkja afskrifaðar árið 2012.
