\"Það ríkir vissulega reiði í Grikklandi. En fram hefur komið að meira en tveir þriðju hluta grískra kjósenda vilja Evrópusamstarfið áfram og halda evrunni,\" skrifar Þorsteinn Pálsson í nýjasta pistli sínum á hringbraut.is vegna þórðargleði ESB-andstæðinga um ófarir Grikkja.
Hann segir að stuðningur við sambandið og myntbandalagið sé reyndar meiri í Grikklandi en mörgum öðrum aðildarríkjum: \"Þegar Grikkir sjálfir, eftir allt sem á undan er gengið, telja hag sínum best borgið innan Evrópusamstarfsins og með evru, hvernig er þá með skynsamlegu viti unnt að halda því fram að Íslendingar ættu að draga þann lærdóm af þessum atburðum að útiloka frekara samstarf innan Evrópu? Það er öfugmælavísa, \" bendir Þorsteinn á í þessum skrifum sínum.
Í pistli sínum brýtur hann til mergjar staðhæfingu þeirra sem skrifa gegn Evrópusambandinu af mestum þunga að gríski harmleikurinn hafi sýnt í eitt skipti fyrir öll að hugsjónin um þetta bandalag þjóða um viðskiptafrelsi og lýðræði hafi alltaf verið á sandi byggð og sé nú endanlega hrunin.
Hann vitnar í söguna, máli sínu til stuðnings: \"Frakkar hættu á sínum tíma þátttöku í hernaðarsamstarfi Atlantshafsbandalagsins og ráku höfuðstöðvar þess frá París. Þá hrikti í bandalaginu. En þeir atburðir breyttu engu um nauðsyn þess. Engum datt í alvöru í hug að Ísland ætti að segja sig úr bandalaginu vegna þessara innbyrðis átaka. Að sama skapi verður ekki séð að mismunandi skoðanir á því hversu langt eigi að ganga í aðstoð til Grikkja eigi að breyta afstöðu manna hér heima til Evrópusamvinnunnar,\" skrifar Þorsteinn.
Hann bendir líka á að þegar heimskreppan hafi skollið á hafi flestar þjóðir reynt að leysa málin hver fyrir sig, en eftir á hafi flestir séð að menn hefðu betur reynt að takast á við vandann í samvinnu og með meira viðskiptafrelsi: \"Fjármálakreppan í heiminum síðustu árin hefur sýnt fram á að enn er þörf á ríkari samvinnu þjóða við slíkar aðstæður fremur en sundrungu,\" skrifar Þorsteinn og bætir við: \"Það eru ekki síst smáþjóðir sem hafa hag af slíkri samvinnu. Stórþjóðirnar eiga alltaf auðveldara með að bjarga sér upp á eigin spýtur.\"
Og svo þetta með fullveldið. Þorsteinn spyr: \"Tapaði Grikkland fullveldi sínu? Svarið er: Allar þjóðir sem spila rassinn úr buxunum missa eitthvað af fjárhagslegu sjálfstæði sínu. Það gerðum við og það hafa margar aðrar þjóðir gert. Þetta lögmál getur því engu breytt eigi að byggja ákvörðun á rökum um afstöðu til Evrópusamvinnunnar.\"
Hann bætir við: \"Aðstæður sem þessar hafa miklu fremur sýnt fram á gildi þátttöku í alþjóðlegri samvinnu. Aðild okkar að Alþjóða gjaldeyrissjóðnum og innri markaði Evrópusambandsins kom okkur til að mynda að góðum notum í hruninu.\"
Pistilinn í heild sinni má finna hér til hliðar á forsíðunni.
