Össur Skarphéðinsson fyrrverandi utanríkisráðherra segir í nýrri færslu á fésbókarsíðu sinni að ekki komið annað til greina en að lánardottnar gríska ríkisins felli niður um þriðjung skulda þess til að leysa vanda Grikkja.
Greining Össurar er þróttmikil. Hann segir Grikki hafa „svindlað“ sér inn í evrusamstarfið með því að sýna miklu minni opinberar skuldir en raunin var, en samkvæmt Maastricht skilyrðunum frá 1999 máttu ríki ekki hafa meiri skuldir en 60 % af landsframleiðslu, og fjárlagahalli mátti ekki vera meiri en 3 %. \"Grikkjum tókst,\" skrifar Össur \"með hjálp alþjóðlegra og virtra ráðgjafa, einsog Goldman Sachs, að sýna fram á að þeir stæðust skilyrðin. En Goldman Sachs beitti vægast sagt skapandi bókhaldstrixum, fann m.a. upp fyrir þá mjög dúbíus vafninga sem földu raunverulegar skuldir þannig að þær komu ekki fram fyrr en síðar. Þessar stofnanir aðstoðuðu Grikki við að tengja útgjöld framhjá fjárlögum. Þegar málin voru skoðuð síðar kom í ljós, að ríkisskuldir voru ekki 60 % við inngöngu í evruna, heldur 114 %. Fjárlagahallinn var miklu meiri, og fór sum ár upp í 12 %. Sekt, eða ábyrgð ESB, liggur í því að allir vissu þetta. Það voru pólitíkusar ESB sem settu kíkinn fyrir blinda augað, vitandi vits að Grikkir voru að svindla. Þess vegna liggur mikil ábyrgð á þeim. Það réttlætir kröfuna um að þeir taki hluta skuldanna á sig.\"
Össur skrifar áfram: \"Þegar Grikkir komust í þrot 2009 einkenndi hik, tafir og ráðleysi viðbrögð ESB. Innan þess var jafnvel deilt um hvort AGS ætti að koma að lausninni. Liðsinnið í fyrstu lotum vandans var of naumt til að ráða bót á honum. Árið 2012, þegar ráðist var í skuldaniðurfellingar af hálfu lánadrottna, einkum þýskra og franskra banka, urðu þær ekki nema helmingur þess sem þurfti. Ónóg viðbrögð ESB. evrópska seðlabankans og AGS eiga því líka þátt í að magna vandann. Það setur frekari móralska skyldu á þessar stofnanir til að greiða nú leið Grikkja úr kviksyndinu með þeim aðgerðum sem ég lýsti fyrst.\"
Þessi fyrrverandi utanríkisráðherra segir Grikki einfaldlega hafa eytt langt um efni fram. \"Frumorsök vandans eru þó Grikkir sjálfir, fyrst og fremst ráðandi stjórnmálaflokkar, sem á níunda áratug síðusta aldar hófu mikla skuldasöfnun á tímum þegar gríðarlegt framboð var á lánsfé og vextir mjög hagstæðir. Þessi lán tóku óábyrgir stjórnmálamenn Grikkja beinlínis til að tryggja sig í sessi með því að uppfylla kosningaloforð um að belgja út lífeyriskerfið, og standa fyrir lágum sköttum. Þeirra er mesta sökin, en ekki almennings, sem nú líður miklar þrautir fyrir óforsjálni skammsýnna stjórnmálamanna. Í reynd voru þetta hreinræktuð atkvæðakaup. - Í dag hefur gríska ríkið fengið neyðarlán sem samtals eru 250 milljarðar evrar, þó sumir reikni aðstoðina upp í 320 milljarða.\"
Hann segir stjórnsýslu Grikkja vera spillta og vanhæfa: \"Spillinginn birtist m.a. í því að til að fá úrlausn mála þurfa almennir borgarar að múta embættismönnum. Sérstök deild var sett á laggir sem hluti af umbótaáætlun, og komst að því að 13 % Grikkja greiðir næstum milljarð evra á ári sem afhent er „a la Don Corleone“ í brúnum bréfpokum til viðtakenda. Skattkerfið sjálft er stórfurðulegt og einkennist af miklum skattaundanþágum. Stórar greinar, einsog gríski skipaiðnaðurinn, sem er sá stærsti í heimi, komast nánast hjá öllum sköttum. Heilar eyjar eru m.o.m. skattlausar. Skattheimtan sjálf er einnig í molum. 7 af hverjum 10 sjálfstætt starfandi Grikkjum stela undan skatti.\"
