Grikkir fá gálgafrest til morguns

Sigmundur Ernir Rúnarsson skrifar

8. júlí 2015 kl. 07:47

Fréttir & pistlar

Grikkir fá frest fram á fimmtudag til að leggja fram tillögur sínar til lausnar á skuldavanda ríkisins. Þetta varð niðurstaða fundar leiðtoga evruríkjanna í Brussel í gærkvöld. Enn er alls óvíst er hvort þeir fái nokkurrn afslátt af skuldum sínum.

Donald Tusk, forseti leiðtogaráðs ESB tilkynnti ákvörðun þessa efnis seint í gærkvöld, en á sunnudag hefur annar fundur leiðoga allra Evrópusambandsríkjanna verið boðaður þar sem tekin verður afstaða til væntanlegra tillagna Grikkja, sem eins og kunnugt er höfnuðu skilmálum lánardrottna sinna í þjóðaratkvæðagreiðslu með nokkuð afgerandi hætti í í byrjun júlí.

Tusk sagði við fréttamenn í gærkvöld að einungis væru fimm dagar til stefnu til að koma í veg fyrir að allt færi á versta veg. Næðust ekki samningar blasti gjaldþrot við gríska bankerfinu og ríkinu öllu. Ákveðið hefði verið að boða leiðtoga allra sambandsríkjanna á fundinn þar sem úrslitastund væri runnin upp og málið varðaði alla Evrópu.

Matteo Renzi, forsætisráðherra Ítalíu, ræddi einnig við fréttamenn að loknum fundinum í gærkvöld. Hann kvaðst vonast til þess að fundurinn á sunnudag yrði sá síðasti um vanda Grikklands. Hann væri vongóður um að samkomulag gæti náðst þá, og málið fengið farsælan endi.

Angela Merkel Þýskalandskanslari sagðist ætla að Grikkir myndu þegar á morgun óska eftir nýju neyðarláni til margra ára, með viðeigandi tillögum um aðgerðir í efnahagsmálum.

Bæði fjármálaráðherrar og forsætisráðherrar evruríkjanna funduðu um málefni Grikklands í Brussel í dag en sendinefnd Grikkja kom tómhent til fundar, án nýrra tillagna um lausn á skuldavanda ríkisins.

Hætta er á upplausn í Grikklandi ef ekki næst samkomulag um næstu skref fljótlega, segir seðlabankastjóri Frakklands, Christian Noyer: \"Gríska hagkerfið er á barmi bjargbrúnar. Það er algjörlega nauðsynlegt að samkomulag náist á sunnudag því það verður of seint líði lengri tími og afleiðingarnar verða alvarlegar,“ sagði Noyer í viðtali við franska ríkisútvarpið í morgun. Hann óttast óeirðir og upplausn í landinu.