Aðstæður íslenskra mæðra eru einstaklega góðar hér á landi í samanburði við ríki á borð við Bandaríkin. Þetta segir í nýrri grein sem birtist í The New Yorker í gær.
Greinin, sem ber yfirskriftina „Hinar sjálfstæðu mæður Íslands“ eða „The Independent Mothers of Iceland“ lofsamar þróun jafnréttismála á Íslandi og þá sér í lagi móðurhlutverkið. Þar segir að í samanburði við Bandaríkin megi finna ákveðna ró yfir móðurhlutverkinu á Íslandi. Íslenskir foreldrar fái til að mynda ýmiss konar félagsleg réttindi, svo sem níu mánaða fæðingarorlof og leikskóla á viðráðanlegu verði.
Þá er fjallað um frjálslegt viðhorf Íslendinga til lífsins og kosti þess að búa í litlu samfélagi þar sem „fólksfjöldi er minni en á Staten Island“, líkt og segir í greininni. Vakin er athygli á því að börn séu gjarnan hvött til að ganga til og frá skóla án eftirlits fullorðinna, ganga yfir götur einsömul og að hæsta hlutfall barna sem fæðist utan hjónabands í heiminum sé hér á landi. Þá séu íslenskar mæður oftar en ekki á vinnumarkaðnum og þar af leiðandi sé ekki eins mikil pressa á konum að keppa við aðrar mæður og hafa „allan pakkann“, eins og það er orðað í greininni. Í Bandaríkjunum sé hlutunum hins vegar háttað öðruvísi og þar af leiðandi finni bandarískar mæður fyrir meiri kvíða og samkeppni þegar kemur að móðurhlutverkinu.
Tilefni greinarinnar er ljósmyndabók kanadíska ljósmyndarans Annie Ling, sem ferðaðist til landsins síðastliðinn vetur og fylgdist með sex íslenskum konum í móðurhlutverkinu. Tvær áttu fimm börn með þremur mismunandi karlmönnum og önnur var einstæð móðir með tvö einhverf börn. Það sem kom Ling hvað mest á óvart var hversu afslappað og þægilegt andrúmsloftið var í kringum konurnar: „Konurnar voru á engan hátt dæmdar af samfélaginu sem þær bjuggu í. Og af því að samfélagið samþykkti þær eins og þær voru þá einkenndust aðstæður þeirra af mun meiri ró og næði en annars staðar.“ Að mati Ling er gífurlegur munur á að vera móðir í Bandaríkjunum og á Íslandi og lofsamar hún hið frjálslega viðhorf sem virðist ríkja hér á landi til móðurhlutverksins.
Í greininni er það þó tekið fram að veruleiki íslenskra kvenna sé þó ekki alltaf eins jákvæður og virðist við fyrstu sýn. Fjallað er um hægagang íslenska dómskerfisins þegar kemur að kynferðisbrotamálum og leið íslenskra kvenna til að vekja athygli á kynferðisofbeldi með reynslusögum sínum í lokaða fésbókarhópnum Beauty Tips.
