Það er til marks um tíðarfarið um allt land að opnun golfvalla er frestað, jafnvel ítrekað, en opnunartími skíðasvæða er framlengdur. Muna þeir sem renna sér á tveimur jafnfljótum vart annað eins vor þegar kemur að góðu skíðafæri.
Frostharkan er enda viðvarandi. Ef rýnt er í kortin sést að hiti er langt frá því að komast í námunda við tveggja stafa tölu á næstu dögum og raunar má búast við því að hitinn verði um og undir frostmarki um norðaustan- og austanvert landið fram yfir næstu helgi. Annars staðar á landinu er ekki hægt að búast við meiri hita en frá 0 gráðum að 7 stigum.
Það er því að vonum að gróður taki seint við sér í svona árferði, en grasspretta er vart eða ekki byrjuð, auk þess sem trén móka enn í vetrardvala sínum og eru fráleitt að sperra sig. Gróðurþekjan er því ennþá mjög viðkvæm á flestum golfvöllum sem þola fyrir vikið lítið álag - og enda þótt velflestir þeirra hafi komið vel undan vetri taka forráðamenn stærstu vallanna ekki þá áhættu að hleypa miklum mannfjölda inn á þá. Nokkrir minni klúbbar hafa hins vegar þegar opnað velli sína.
Í þessum óblíða kaldrana situr snjórinn auðvitað sem fastast. Af þeim sökum er ennþá opið í Bláfjöllum sem er fáheyrt á þessum árstíma, en skilaboðin frá forráðamönnum skíðasvæðisins eru skýr og uppörvandi: "Hér í Bláfjöllum verður opið frá 17:00-21:00 og stefnum á að fá 500 manns í fjallið í kvöld! Koma svoooo, nýta þessa síðustu daga í sólinni!! Lang lang besti dagurinn til þessa."
