Gísla Þór Þórarinssyni blæddi út eftir að hann fékk skot í lærið. Hann var skotinn til bana snemma morguns laugardaginn 27. apríl í Mehamn í Noregi. Er Gunnar Jóhann Gunnarsson, hálfbróðir Gísla Þórs, grunaður um að hafa orðið honum að bana. Mbl.is greinir frá.
Frumniðurstöður krufningar leiddu dánarorsök Gísla Þórs í ljós og búið er að tilkynna utanríkisráðuneyti Íslands að krufningu sé lokið. Því megi flytja lík Gísla Þórs til Íslands.
Rannsókn málsins stendur þó enn yfir og hefur hún leitt í ljós að Gunnar Jóhann og Almar Smári Ásgeirsson hafi fengið skotvopnið í hendur daginn sem Gísli Þór var myrtur. „Rannsókn á vopninu og rafrænum sporum heldur áfram. Hvorugur sakborninganna var skráður eigandi skotvopns. Lögregla hefur á þessum tímapunkti engar áþreifanlegar sannanir fyrir því að þeir hafi orðið sér út um vopnið í einhverjum sérstökum tilgangi,“ segir í tilkynningu lögreglunnar.
Gunnar Jóhann er nú í gæsluvarðhaldi til 28. maí en lögreglan mun fara fram á framlengingu þess þegar sá tími rennur út. Hann var yfirheyrður fyrir viku síðan en ekki er búið að yfirheyra hann öðru sinni. Hefur lögreglan í Finnmörku yfirheyrt um 50 vitni vegna málsins til þessa.
Almar Smári var upphaflega dæmdur í viku gæsluvarðhald vegna gruns um aðild að málinu en var sleppt fyrr eftir að hann lá ekki lengur undir grun hjá lögreglu.
