Gerðum það sama og síðasta stjórn

Ragnheiði Elínu Árnadóttur, ferðamálaráðherra finnst það skjóta nokkuð skökku við að ráðherra síðustu ríkisstjórnar gagnrýni hana fyrir að ráða stjórnenda ríkisstofnunar án auglýsingar því sama hafi verið gert á síðasta kjörtímabili.

Þetta kom fram í samræðum Ragnheiðar Elínar og Katrínar Júlíusdóttur, varaformanns Samfylkingarinnar og fyrrverandi ferðamálaráðherra á Alþingi í gær þar sem sú síðarnefnda gagnrýndi nýtt ríkisbákn ferðaþjónustunnar harðlega og taldi að vart gæti það farið ver af stað en með ráðningu manns án auglýsingar sem fengi tvær milljónir króna í mánaðarlaun.

Þessi nýjasti ríkisforstjóri er ráðinn til sex mánaða þótt verk­efnið sé til fimm ára. Sagði Ragnheiður Elín að ráðninguna megi skoða í ljósi þess einbeitta vilja ráðuneyt­is­ins að láta þetta verk­efni kom­ast af stað, en sá vilji hefði ekki síður verið til staðar hjá Sam­tök­um ferðaþjón­ustu, sem sé sam­starfsaðili þeirra í mál­inu.

Hún sagði að við ráðning­una hafi verið horft til for­dæma frá síðasta kjör­tíma­bili, t.d. þegar for­stöðumaður Inspired by Ice­land her­ferðar­inn­ar hafi verið ráðinn tíma­bundið og svo hafi sá samn­ing­ur verið fram­lengd­ur reglu­lega.

Katrín bað Ragn­heiði einnig að skýra hvort að þetta nýja embætti kallaði á að Ferðamála­stofa, Íslands­stofa eða Rann­sókn­ar­miðstöð ferðamála yrðu af­lögð, nú þegar ný stofn­un hefði verið stofnuð. Ragn­heiður sagði þetta ekki vera nýja stofn­un, held­ur sam­starfs- og sam­ráðsvett­vang. Sagði hún ástæðu þess að þetta væri sér­stak­lega stofnað í stað þess að setja verk­efnið und­ir fyrr­nefnd­ar stofn­an­ir væri sú að í dag væru verk­efn­un­um dreift víða og þarna væri hægt að ná utan um þau á einn stað. Sagði Ragn­heiður að stofn­an­irn­ar myndu enn gegna sín­um hlut­verk­um.