Ákvörðun gerðardóms á launum hjúkrunarfræðinga felur í sér meiri hækkun en ríkið hafði boðið þeim, að sögn Ólafs G. Skúlasonar, formanns Félags íslenskra hjúkrunarfræðinga, sem er við fyrstu sýn nokkuð sáttur við hana. Á móti kemur að samningatíminn sé langur, rúm fjögur ár.
Samningurinn gildir fram í mars 2019, þremur mánuðum lengur en samningar á almennum markaði og kveður á um 7,2% hækkun frá 1. mars 2015. Ólafur ræðir úrskurðinn við mbl.is í dag: \"Við eigum náttúrlega eftir að fara yfir þetta í þaula. Að vísu er samningstíminn frekar langur en á móti kemur að ef almenni markaðurinn segir upp sínum samningum þá getum við sagt upp okkar. Launahækkunin er hærri en okkur hefur verið boðið hingað til. Við erum ágætlega sátt við það. Við eigum eftir að kíkja betur á þetta en þetta lítur ágætlega út við fyrstu sýn,“ segir Ólafur.
Fulltrúar bæði hjúkrunarfræðinga og BHM munu í kjölfarið funda hvor í sínum ranni um ákvörðun gerðardóms sem kynnt var kl. 14:00. Úrskurðurinn telur um fimmtíu blaðsíður og treystu hvorki Ólafur né Þórunn Sveinbjarnardóttir, formaður BHM, sér til þess að kveða upp endanleg úrskurð um ákvörðunina fyrr en þau hefðu haft tækifæri til að fara betur yfir hana.
