Þetta kom fram í fréttum RÚV í gærkvöld og var fylgt eftir í Kastljósi. Vitneskjan kemur nokkuð á óvart, því íslensk orkuframleiðsla hefur hingað til þótt tiltölulega vistvæn, að minnsta kosti ef hún er borin saman við það sem gerist í nágrannalöndunum. Hér eru til dæmis engin kjarnorkuver, heldur er orkan framleidd með hjálp fallvatns eða jarðhita.
Nú hefur hins vegar komið í ljós að við orkuframleiðslu í Reykjanesvirkjun falla til geislavirk efni. Síðastliðin 10 ár hafa þau verið urðuð á svæðinu, án þess að menn gerðu sér grein fyrir hvers eðlis þau væru. Þetta er í fyrsta skipti, svo vitað sé, sem slík efni falla til hér á landi.
Geislavarnir sendu frá sér tilkynningu um þetta klukkan rétt rúmlega fimm í dag, eftir að fréttastofa hafði haft samband við stofnunina vegna málsins: \"Það hefur komið í ljós að í útfellingum sem eru við borholutoppana, þar sem vatnið kemur upp úr jörðinni, þar verða útfellingar, og í þeim safnast upp náttúruleg, geislavirk efni,“ segir Sigurður M. Magnússon, forstjóri Geislavarna ríkisins við fréttastofu RÚV.
\"Það kemur örlítið á óvart vegna þess að þetta er í fyrsta sinn sem þetta mælist hér á landi,“ segir Ásgeir Margeirsson, forstjóri HS Orku: \"Hins vegar er þetta vel þekkt erlendis - í námuvinnslu, olíuvinnslu og gasvinnslu, og jafnvel í mun meiri mæli en hér.“
Þegar borað er eftir jarðhita í Reykjanesvirkjun er borað niður á rúmlega tveggja kílómetra dýpi. Með vökvanum sem kemur upp fylgja útfellingar, sem setjast inn á rörin. Það eru þessar útfellingar sem eru geislavirkar. Undanfarin ár hafa nokkur tonn af þessu efni verið urðuð: \"Ef við erum að horfa á geislavirknina sem slíka, þá höfum við ekki mælt svona mikla náttúrlega geislavirkni á Íslandi áður,\" segir Sigurður en tekur fram að geislunin sé þó lítil og skammdræg.
Hann segir starfsmönnum HS Orku ekki stafa hætta af þessari geislun, en ef geislavirk efni berast inn í líkamann geti þau valdið geislun þar.
