"Það stoðar lítt fyrir þingmenn að gagnrýna hátt verðlag á dagvörumarkaði ef þeir hinir sömu eru ekki reiðubúnir að grípa til þeirra aðgerða sem eru til þess fallnar að efla samkeppni," skrifar Ragnheiður Ríkharðsdóttir formaður þingflokks sjálfstæðismanna í nýjum pistli sínum á hringbraut.is og segir það vekja furðu að matvörur sem eru ekki framleidddar á Íslandi skuli vera fluttar inn með verð- og magntollum.
Tekjur ríkisins af tollum eru nú um stundir 5,5 milljarðar, þar af eru verndartollar 2 milljarðar. Aðrir tollar af matvöru, sem ekki teljast til verndar nema 2 milljörðum króna og loks eru tollar af fatnaði og skóm um 1,5 milljarðar. Ragnheiður segir að beinast liggi við að endurskoða þessa tollastefnu, en það muni "flytja verslunina heim og skila ríkissjóði þar af leiðandi virðisaukaskatti fyrir utan arðsemi sem felst í vinnandi fólki."
En hún undrast stórum allar víggirðingarnar - og segir vart í boði "að matvörur sem ekki eru framleiddar hér á landi séu bæði tollaðar með verð- og magntollum." Hún nefnir dæmi af þekktum vörum á borð við Parmesean ost og Parma hráskinku sem beri 30% verðtoll og um 430 króna magntoll á hvert kíló. Hægt sé að taka önnur dæmi um matvöru, t.d. kjúklingabringur þar sem erlenda verðið án tolla er 700 kr, en eftir 18% toll, 540 króna magntoll á hvert kíló þá sé verðið komið í 1353 kr og eftir álagningu verslunarinnar borgi neytandinn 1860 kr. fyrir bringurnar.
Svo segir Ragnheiður: "Verðmunur á innlendu og innfluttu án tolla er 166%. Það hlýtur að vera hægt að fara einhverja millileið hér til hagsbóta fyrir neytendur t.d. að lækka 18% toll í 9% og magntolla á hvert kíló um helming."
Hún fagnar því sérstaklega að fjármálaráðherra og flokksbróðir sinn ætli nú að fara þessa vegferð og taka tollakerfið til heildarendurskoðunar, hún sé tilbúin í þá vinnu með honum til hagsbóta fyrir allan almenning - og svo klikkir þingflokksformaðurinn út með þessum orðum; "betra er seint en aldrei."
