Þingmenn minnihlutans á Alþingi gagnrýna harðlega að enn liggi ekki fyrir hvenær gengið verði til kosninga. \"Áttar þessi ríkisstjórn sig ekki á því að almenningur hefur slæma reynslu af því að treysta stjórninni þegar hún lofar kosningum eða þjóðaratkvæðagreiðslu?\" spurði Róbert Marshall Bjartri framtíð í umræðu um málið undir liðnum Um fundarstjórn. Ekki dugi að stjórnin ætli bara að fá næði til að klára öll mál í einum rykk og láta svo kannski kjósa?
Undir þetta tók Björt Ólafsdóttir, BF. Menn þráist við að nefna dagsetningu kosninga en saga um kosningar vegna ESB sýni að engu sé treystandi. Þjóðin eigi heimtingu á að fá að vita hvaða dag verði kosið. Það sé ekki prívatmál tveggja formanna flokkanna eða ráðherra eða þingmanna valdaflokkanna hvenær kosið verði.
22 þingfundadagar eru eftir að starfsáætun Alþingis á vorþinginu. Tilgangslaust er að sögn Steingríms J. Sigfússonar að plana fundi þingnefnda þar sem ekkert liggi fyrir um dagskrá eða hvenær kosið verði. Katrín Jakobsdóttir, formaður VG, segir óþolandi að ekkert liggi fyrir um framhaldið. Best væri að boða til kosninga í vor. Stjórnin hafi ekki notað tímann til að setja mál á dagskrá þingsins sem svo mikilvægt sé sagt að verði að ljúka.
Fleiri þingmenn ræddu málið á svipuðum nótum úr röðum minnihlutans. Sigríður Ingibjörg Ingadóttir, Samfylkingu, sagði óþolandi að tveir ráðherrar stjórnarinnar tengdir aflandsmálum sætu enn. Ekki væri fundarfært á Alþingi við svo búið og allra síst þar sem kjördagur hafi ekki verið boðaður.
Steinunn Þóra Árnadóttir, VG, sagði að þjóðin ætti heimtingu á að vita hvenær kosið yrði. Af praktískum ástæðum væri einnig mjög mikilvægt fyrir þingið að fá að vita það strax.
