Gunnar Bragi Sveinsson, sjávarútvegs- og landbúnaðarráðherra, skrifar um auðlindagjald á Kjarnann. Gunnar Bragi vill sýnilega að við förum okkur varlega í allar breytingar.
Hann skrifar: „Við tökum veiðigjald af tugum tegunda og fáum milljarða til ríkisins árlega í arð fyrir ríkisjóð. Okkar fyrirkomulag er þó ekki án galla og mikilvægt er að fylgjast með hvað aðrir gera. Í því samhengi þarf að færa umræðuna um afnotagjald fyrir auðlindir yfir á allar auðlindir. Finna kerfi sem hægt er að beita á allar þær auðlindir þar sem greitt er fyrir afnot af eða ætti að greiða fyrir. Ég tel fýsilegast að beita skattkerfinu til þess. Fyrst þarf þó að byrja á að skilgreina hvað eru auðlindir og taka síðan ákvörðun um hvort við viljum yfirleitt að greitt sé gjald fyrir afnot af þeim.“
Hann opnar á breytingar á auðlindagjaldi, en þó ekki fyrr en við finnum kerfi sem hægt er að beita á allar þær auðlindir þar sem greitt er fyrir afnot af eða ætti að greiða fyrir. Og hann vill einnig að byrjað verði á að skilgreina hvað eru auðlindir og taka síðan ákvörðun um hvort við viljum yfirleitt að greitt sé gjald fyrir afnot af þeim.
Semsagt. Slá málinu á frest. Frestur er jú á illu bestur.
„Við í Framsókn hefðum viljað sjá náttúruauðlindum landsins komið tryggilega fyrir í eigu þjóðarinnar. Það hefur þó ekki náðst meirihluti fyrir því enn sem komið er. Sú breyting og jafnvel fleiri er fyrirsjáanlegt að ráðast þurfi í á næstu árum af skynsemi og varfærni,“ skrifar ráðherrann.
Hann er til í allt, bara ekki núna.
-sme
