„Ég held að Matthías Bjarnason hafi verið við hliðina á honum niðri á þingi þegar hann opnaði töskuna og dýrðin blasti við. Árni var ekki lengi að loka töskunni,“ segir ljósmyndarinn Ragnar Axelsson í viðtali í Morgunblaðinu í dag.
Ragnar er að hætta störfum á Morgunblaðinu eftir 46 ára starf en í viðtalinu talar hann meðal annars um feril sinn sem er í senn langur og glæstur. Í viðtalinu segir Ragnar einnig skemmtilegar sögur, til dæmis eina af Árna Johnsen, fyrrverandi blaðamanni og þingmanni, en hann og Ragnar unnu lengi saman á Morgunblaðinu.
„Ég lærði margt af Árna en við vorum líka duglegir að stríða hvor öðrum og æsa hvor annan upp,“ segir hann í viðtalinu við Orra Pál Ormarsson. Hann rifjar svo upp skemmtilega sögu.
„Einu sinni bað Árni mig að passa frakkann sinn og skjalatöskuna. Ég notaði að sjálfsögðu tækifærið til að fylla hvort tveggja af smokkum í öllum regnbogans litum. Ég held að Matthías Bjarnason hafi verið við hliðina á honum niðri á þingi þegar hann opnaði töskuna og dýrðin blasti við. Árni var ekki lengi að loka töskunni. Um kvöldið hringdi Árni og bað mig um útskýra fyrir Dóru, eiginkonu sinni, hvað væri í frakkavösunum og töskunni. Það sauð á Árna en hann hefndi sín rækilega í Thule síðar,“ segir Ragnar.
Í viðtalinu kemur fram að Ragnar ætli nú að einbeita sér að því að mynda mannlífið á norðurslóðum.
„Ég geng út af Morgunblaðinu með sting í hjarta. Ég hef verið meira þarna en heima hjá mér undanfarin 44 ár og þykir ofboðslega vænt um blaðið. Ég hef fórnað öllu fyrir Morgunblaðið og er stoltur af mínu framlagi gegnum tíðina,“ segir hann meðal annars í viðtalinu.
