Fylkir er látinn: „Ein­stakur, hóg­vær, um­hyggju­samur, glað­legur og traustur“

Fylkir Þóris­son, fyrr­verandi starfs­maður RÚV, er látinn 78 ára að aldri. Fylkir starfaði alla sína starfs­æfi hjá RÚV þar sem hann var lengst af deildar­stjóri þróunar­sviðs mynd­tækja­deildar. Hann hóf störf hjá ný­stofnuðu RÚV eftir nám í Þýska­landi og starfaði þar ó­slitið til ársins 2007, samtals í 40 ár.

Út­för Fylkis fer fram frá Grafar­vogs­kirkju í dag, 6. mars, klukkan 15.

Fjöl­margir minnast Fylkis í minningar­greinum í Morgun­blaðinu í dag, þar á meðal Jón H.B. Snorra­son, sak­sóknari hjá Ríkis­sak­sóknara og frændi Fylkis.

„Hann var ein­stakur, hóg­vær, um­hyggju­samur, glað­legur og traustur. Við okkur yngri var hann ein­stak­lega natinn og þolin­móður. Hann leyfði okkur að hanga með sér þótt aldurs­munurinn væri um­tals­verður. Það var alltaf eitt­hvað spennandi að gerast hjá Fylki. Mér fannst þá að hann gæti allt. Ég hef á lífs­leiðinni komist að því að sú var raunin. Hann smíðaði hús, innan­stokks­muni, gerði við öll tæki stór og smá, bíla og hvað­eina sem nöfnum tjáir að nefna,“ segir Jón meðal annars.

Í starfi sínu hjá RÚV sá Fylkir meðal annars um hönnun á tækni­legum tækja­kosti Sjón­varpsins í sam­starfi við aðrar deildir, hafði um­sjón með upp­setningu búnaðarins og smíði í kringum hann. Hann sá um um­skiptin úr svart/hvítu í lit og endur­hannaði út­sendingar­kerfið þegar Sjón­varpið flutti af Lauga­vegi upp í Efsta­leiti. Þá hafði hann veg og vanda af út­sendingar­bílum Sjón­varpsins og tækni­legum við­bótum við út­sendingu, texta­varpinu til dæmis.

Eyjólfur Valdimars­son, rekstrar­stjóri hjá RÚV og yfir­maður tækni­mála, fer hlýjum orðum um Fylki í grein sinni. „Fylkir var traustur starfs­maður og var að jafnaði léttur í lund,“ segir hann og bætir við að á löngum ferli sínum hafi Fylkir öðlast fjöl­breytta reynslu í vinnslu og með­ferð sjón­varps­efnis.

„Hann varð lykil­maður í hönnun og upp­setningu tækni­kerfa Sjón­varpsins. Þar kom fram góð yfir­sýn hans yfir sjón­varps­tæknina. Hann fylgdist vel með þróun hennar og hafði út­sjónar­semi til að meta hvað hentaði dag­legum rekstri Sjón­varpsins og hvernig tak­mörkuð fjár­ráð til fjár­festinga í tækni­búnaði nýttust sem best. Þar var Fylkir mjög til­lögu­góður.“

Fylkir var vel á sig kominn og mikill göngu­garpur eins og sást ber­lega í við­tali sem birtist við hann í Morgun­blaðinu í fyrra­sumar. Til­efnið var ganga Fylkis frá Osló til Þránd­heims, 643 kíló­metrar, sem hann gekk einn.