Samgöngustofa mun í samvinnu við lögregluna um allt land fylgjast sérstaklega með flugi um komandi verslunarmannahelgi sem er mesta ferðahelgi landsmanna hvort heldur er á láði eða á lofti.
Eftirlitið kemur til af því að nokkuð hefur borið á því undanfarin ár að flugmenn án flugrekstrarleyfis hafi tekið að sér farþegaflug um þetta leyti árs þegar mest r að gera í flutningi fólks á milli landshluta. Uppgrip af því tagi er ólögleg, enda þarf sérstakt leyfi Samgöngustofu til farþegaflugs - og er lögregla látin hafa afskipti af málum sem þykja grunsamleg í þessu efni.
Að sögn Einars Magnúss Magnússonar upplýsingafulltrúa Samgöngustofu verður þetta eftirlit hert sérstaklega nú um helgina, en hann segir að einna helst hafi borið á ólöglegu farþegaflugi á milli lands og Vestmaannaeyja á undanförnum Verslunarmannahelgum, en þangað streymir iðulega á annan tug þúsunda gesta til að njóta mannlífs og menningar í Herjólfsdal.
