Fornleifafræðingar hafa grafið niður á minnst 20 metra langan skála frá landnámsöld við Lækjargötu í miðbæ Reykjavíkur, en hann hefur að geyma einn lengsta landeld sem fundist hefur hér á landi.
Er skálinn um 5,5 metrar á breidd þar sem hann er breiðastur og inni í honum miðjum hefur sem fyrr segir verið einn stærsti langeldur sem fundist hefur á Íslandi, en sjáanleg ummerki sýna að hann hefur verið minnst 5,20 metrar á lengd. Er skáli þessi stærri en sá sem fannst á sínum tíma við Aðalstræti, að því er fram kemur í máli og myndum í umfjöllun um fornleifafund þennan í Morgunblaðinu í dag.
„Þessi fundur hefur komið okkur öllum mjög á óvart og er eiginlega endurritun á sögu Reykjavíkur,“ segir Þorsteinn Bergsson, framkvæmdastjóri Minjaverndar við blaðið og segir landnámsskálann í Aðallstræti hjóm eitt miðað við skálann sem fundist hefur í Lækjargötu.
Uppgröfturinn er á lóð við hlið gamla Íslandsbankahússins í Lækjargötu en þar á að reisa hótel í framtíðinni.
