Félagsbústaðir eiga um 2.000 íbúðir og herbergi í Reykjavík. Í umsögn félagsins við frumvarpið segir að þeir sem leigi hjá félaginu undirrita skriflega beiðni þar sem þess er óskað að húsaleigubætur og sérstakar húsaleigubætur séu greiddar til Félagsbústaða. Í frumvarpi Eyglóar er kveðið á um óheimilt verði að framselja húsnæðisbætur á þennan hátt.
Félagsbústaðir segir í umsögn sinni að þetta verði til þess að vanskil á leigu til félagsins muni aukast - komi til taps vegna slakrar innheimtu verði að bæta það upp með hækkun leiguverðs. Þá er á það bent að ef félagið geti ekki gengið að húsnæðisbótum vísum muni lánskjör félagsins versna sem leiði af sér hækkun kostnaðar og leigu.
Félagsbústaðir telja, að því er fram kemur í frétt ruv.is um málið í morgun, breytinguna ekki til þess fallna að auka gagnsæi í velferðarkerfinu - hætta sé á að bótum sem ætlaðar eru til að uppfylla húsnæðisþörf leigutaka verði varið til annarra þarfa eða langana.
