Frú Vig­dís minnist Bjarna: „Við eigum um hann svo afar góðar minningar“

Frú Vig­dís Finn­boga­dóttir, fyrr­verandi for­seti Ís­lands, er meðal þeirra sem minnast Bjarna Val­geirs Guð­munds­sonar for­seta­bíl­stjóra. Hann lést á Landa­koti þann 19. febrúar síðast­liðinn, 85 ára að aldri. Bjarni hóf störf hjá for­seta­em­bættinu árið 1980 og starfaði þar til starfs­loka.

„Það er einatt lán að eignast góða vini meðal sam­starfs­manna. Bjarni V. Guð­munds­son var um­sjónar­maður og bíl­stjóri á höfuð­bólinu á Bessa­stöðum í tíð okkar mæðgna, ná­granni okkar á Álfta­nesinu á Jörfa, hinum megin við Bessa­staða­tjörn, og við eigum um hann svo afar góðar minningar,“ segir Vig­dís í minningar­grein sem birt er í Morgun­blaðinu í dag.

Bjarni ólst upp í Skaga­firði en flutti til Reykja­víkur árið 1951 þar sem hann lauk námi í bif­véla­virkjun. Hann starfaði við greinina í 23 ár, eða allt til ársins 1980 að hann hóf störf hjá em­bætti for­seta.

„Hann sinnti með ráðs­konu staðarins inn­kaupum til heimilisins, ók heima­sætunni í barna­skólann á Álfta­nesi og kenndi henni að keyra bíl úti í Bessa­staða­nesi þar sem engin var um­ferðin önnur en æðar­fugl og stokk­endur á vappi. Það voru oft skemmti­legar skraf­s­tundir á háu kollunum við stóra fram­reiðslu­borðið í gamla eld­húsinu á Bessa­stöðum og margar minnis­verðar ferðir farnar í heim­sóknir út á land, þar sem Bjarni oftar en ella ók staðar­jeppanum með á­fastri kerru sem hlaðin var trjá­plöntum til gróður­setningar á lands­byggðinni. Skógur á hjólum,“ segir Vig­dís.

„Hann var við­ræðu­góður og glað­sinna og þar á ofan afar tón­hneigður, söng lengi í kirkju­kórnum okkar á nesinu og spilaði prýðis­vel á harmonikku dillandi polka og ræla heima­mönnum til mikillar á­nægju. Ég minnist Bjarna á Jörfa, sam­starfs­manns míns um ára­bil, með mikilli hlýju,“ segir Vig­dís.

Bjarni ræddi starfið stutt­lega í við­tali við DV árið 1996 en þá hafði hann verið for­seta­bíl­stjóri í 16 ár. Það ár lét Vig­dís ein­mitt af em­bætti og Ólafur Ragnar Gríms­son tók við. Í við­talinu sagði hann að starf öku­manns for­setans væri fjöl­breytt og snerist um meira en akstur með for­setann.

„Ég ók fyrst fyrir Kristján Eld­járn síðustu mánuði hans í em­bætti for­seta og síðan hef ég ekið með Vig­dísi alla tíð síðan hún tók við fyrir 16 árum. Ég mun vissu­lega koma til með að sakna hennar en um leið leggst það vel í mig að aka nýjum for­seta okkar, Ólafi Ragnari Gríms­syni,“ sagði Bjarni sumarið 1996 en þá hitti blaða­maður á hann á Þórs­höfn þar sem hann ók Vig­dísi milli staða í þorpinu.

Útför Bjarna var gerð frá Bessastaðakirkju 2. mars síðastliðinn.

Bjarni Valgeir ræddi við DV um starfið árið 1996. Mynd: Tímarit.is