Gunnar Ingi Gunnsteinsson lætur af störfum sem framkvæmdastjóri Menningarfélags Akureyrar (MAk) frá og með 1. desember nk., af persónulegum ástæðum með samkomulagi við stjórn.
Staða framkvæmdastjóra verður auglýst laus til umsóknar á næstu dögum.
Gunnar er fyrsti framkvæmdastjóri MAk, en félagið tók við rekstri Leikfélags Akureyrar, Sinfóníuhljómsveitar Norðurlands og Menningarhússins Hofs um síðustu áramót.
Í tilkynningu á vefsíðu menningarfélagsins segir að undir forystu Gunnars hafi MAk náð góðum árangri í samrekstri félaganna þriggja og aukið umsvif þeirra.
„Stjórn MAk þakkar Gunnari gifturíkt samstarf og óskar honum velfarnaðar,\" segir á vef MAk.
