Heiða Kristín Helgadóttir, einn stofnenda Bjartrar framtíðar, segir að vanda flokksins megi rekja til formannsins og annarra sem þar starfa. Hún hyggst ekki starfa fyrir flokkinn í náinni framtíð.
Rætt er við Heiðu Kristínu á vef Kjarnans, þar sem greint er frá því að hún er hætt með vikulegan umræðuþátt sinn, Umræðuna, sem sýndur var í Íslandi í dag á Stöð 2.
Heiða Kristín er varaþingmaður Bjartar Ólafsdóttur sem senn fer í fæðingarorlof, en hún hefur ekki áhuga á að taka sæti hennar þegar þar að kemur. Segir Heiða Kristín að eitthvað mikið þurfi að gerast hjá Bjartri framtíð til að henni finnist ákjósanlegt að stíga inn á þann vettvang aftur: \"Mér finnst vandi Bjartrar framtíðar vera inni í Bjartri framtíð, hann er ekki vandi kjósenda. Vandinn er ekki tilkominn vegna þess að kjósendur skilja ekki flokkinn heldur er hann vandi formannsins og þeirra sem starfa í Bjartri framtíð.\"
Fylgi Bjartrar framtíðar hefur verið á hraðri niðurleið undanfarna mánuði og síðast í morgun mældist flokkurinn með 4,4 prósenta fylgi í skoðanakönnun MMR sem myndi ekki nægja til þess að koma að manni á þing.
