Þorsteinn Pálsson, fyrrverandi forsætisráðherra segir að ef til vill sé tímabært að forseti Íslands fái nýja stöðu í stjórnskipan landsins eftir að þjóðinni sjálfri verður falið það vald að vísa málum í þjóðaratkvæði. Forsetinn geti vel stjórnað störfum Alþingis.
\"Verði niðurstaðan sú að öryggishemillinn um þjóðaratkvæði verði færður frá forsetanum til hluta kjósenda,\" skrifar Þorsteinn í nýjasta pistli sínum á Hringbraut \"yrði lítið eftir af upprunalegu stjórnskipulegu hlutverki þjóðhöfðingjans. Þá er eðlilegt að menn velti fyrir sér hvort ekki væri rökrétt að það leiddi til frekari breytinga.\"
Þorsteinn segir að í því samhengi vakni sú spurning hvort færa megi embættinu ný stjórnskipuleg viðfangsefni við hæfi, því hitt eigi örugglega minni hljómgrunn að leggja embættið niður: \"Það á dýpri rætur í þjóðarsálinni en svo,\" bendir hann á og nefnir svo nýjan starfa: \"Vilji menn breyta er einn kosturinn að færa þjóðkjörnum forseta lýðveldisins það hlutverk að vera jafnframt forseti Alþingis,\" skrifar hann og segir að löggjafarvaldið fengi þá þjóðkjörinn stjórnanda sem hefði sjálfstætt umboð og væri óháður stjórnarmeirihluta hverju sinni: \"Stjórnskipunin yrði einfaldari og skýrari og þjóðhöfðinginn fengi verðugt hlutverk í ágætu samræmi við stærð landsins og nútíma stjórnarhætti.\"
Þorsteinn segir að við slíka breytingu væri eðlilegt að forseti staðfesti lög einn með undirskrift sinni. Í núverandi stjórnarskrá sé undirritun forseta gildislaus nema ráðherra staðfesti hana jafnframt með undirskrift sinni: \"Satt best að segja er það hálf niðurlægjandi fyrir þjóðhöfðingjann,\" skrifar þessi margreyndi stjórnmálamaður og segir verklagið af þessu tagi vera eftirhreytur úr gömlum dönskum stjórnskipunarlögum sem upphaflega hafi byggt á annarri hugmyndafræði um valdið.
\"Vilji menn sögulegar tilvísanir,\" skrifar Þorsteinn \"mætti segja að eftir slíka breytingu hefði þjóðhöfðingjaembættið fremur skírskotun til lögsögumanns þjóðveldistímans en gamla danska konungsvaldsins. Í því ljósi yrði það einfaldlega meira íslenskt og minna danskt,\" því í reynd eigi umgjörð forsetaembættisins í núverandi mynd rætur í konungdómi og stéttaskiptingu liðinna alda.
