Eitt títt nefndra forsetaefna sem beðið er að taki ákvörðun um Bessastaði er Guðni Th. Jóhannesson sagnfræðingur. Margir telja að hann hafi slegið í gegn með frammistöðu sinni í sjónvarpi örlagadagana miklu í síðustu viku þegar Sigmundur Davíð Gunnlaugsson fór frá völdum vegna hneykslismáls. Í samtali við Hringbraut í fyrradag svaraði Guðni spurningu um guðstrú að hann tryði á almættið en þar kom einnig fram að hann stendur utan trúfélaga, er ekki í þjóðkirkjunni. Hann fæddist til kaþólskrar trúar en sagði sig frá kaþólsku vegna níðingsverka presta kirkjunnar og yfirhylmingar.
Í facebook-færslu gat Guðni þess í vikunni að hann hefði bæði hitt trúleysingja á Harmageddon og setið fund með félögum í KFUM sama daginn.
Sagan segir að það getur þvælst fyrir forsetaefni að segjast ekki trúa á Guð. Þanig lenti Ólafur Ragnar Grímsson um tíma í miklum vanda með sjálfan sig þegar eltar voru uppi í baráttunni 1996 fyrri yfirlýsingar hans um að hann tryði ekki á Guð. Fór það svo að Ólafur tók trú eftir að hann bauð sig fram, vann kosningarnar og ríkir enn. Þá hafði verið leitað til lögmanna um hvort forseti mætti standa utan þjóðkirkjunnar. Í frétt Hringbrautar á dögunum þar sem trúmál og forsetaframboð voru til umfjöllunar var rifjuð upp tilvitnun í lögspeking, Gunnar Schram, á sínum tíma um Ólaf Ragnar, trúarlega stöðu og forsetaembættið: \"Það er raunverulega ekki hægt að krefjast annars af forsetanum en að hann gangi ekki gegn hagsmunum þjóðkirkjunnar. Honum ber samkvæmt 62. grein stjórnarskrárinnar að styðja og vernda þjóðkirkjuna. Þetta eru skyldur sem þjóðhöfðinginn hefur af því að hann er hluti af ríkisvaldinu. Ég tel að það gengi ekki að hann tæki virkan þátt í öðrum trúarsöfnuðum eða mælti gegn þjóðkirkjunni. Þá væri hann farinn að brjóta embættisskyldur sínar.”
Þorri Íslendinga er enn kristinn og einkum íhaldssamir kjósendur, ekki síst úti á landi, eru margir hverjir líklegri til að kjósa þá sem hafa trúarlegan bakgrunn sem þeir tengja við eftir því sem fram hefur komið í greiningum álitsgjafa á félagsmiðlum.
En hvernig hafa \"heitir\" frambjóðendur gefið til kynna trúarlegar tengingar að undanförnu?
Skoðun sýnir að þótt margt hafi breyst í samfélaginu síðan 1996 horfa frambjóðendur enn til trúarþátta. Andri Snær Magnason rithöfundur birti á facebook skömmu áður en hann tilkynnti um eigið framboð mynd sem tekin var í kirkju af dóttur hans og fjölskyldu við fermingu. Hann var spurður um guðstrú á opnum fundi á Hótel KEA sl. föstudag um guðstrú og sagði þá dæmisögu þegar hann lenti í vanda í Ölpunum og \"fór beint í Guð\" þrátt fyrir þessa hyggju nútímamannsins að trúa aðallega á sjálfan sig. Hver kannast ekki við að við leitum hjálpar á ögurstundu? Þá var síðasta færsla Eiríks Björns Björgvinssonar, bæjarstjóra á Akureyri, áður en fram kom í fjölmiðlum að hann renndi hýru auga til Bessastaða, hrós til prests á Akureyri sem hafði flutt góða ræðu í kirkju í páskamessu að mati bæjarstjórans. Tveir prestar voru um tíma nefndir við forsetaframboð. Annar þeirra, Davíð Þór Jónsson, hefur nú lýst yfir að hann sé hættur við og styðji framboð Andra Snæs.
Það var því eflaust engin tilviljun þegar Geir Haarde kaus korteri eftir hrun að hegða lokaorðum sínum svo eftirminnilega í beinni útsendingu: Guð blessi Ísland!
Samantekt: BÞ
