Sigmundur Davíð Gunnlaugsson forsætisráðherra hefur brugðist við gagnrýni fjölmargra fræðimanna en ummæli hans um helgina hafa kallað á mikla reiði hjá hluta háskólakennara. Í nýrri færslu á facebook segir Sigmundur Davíð að fyrrverandi ráðherra síðustu ríkisstjórnar [Gylfi Magnússon] “...og fáeinir samherjar hans (sem vilja þó líklega allir láta kalla sig óháða sérfræðinga) hafa brugðist illa við því að ég, og margir aðrir, bentum á að mikilvægt væri að veita fjármagni í menntastofnanir um allt land,” eins og Sigmundur orðar það á eigin síðu.
Sigmundur vísar til þess að fréttir hafi verið gerðar um viðbrögð fræðimannanna sem hann þó ekki nafngreinir:
“Facebookskrif fjórmenninganna hafa orðið tilefni a.m.k. tveggja frétta. Í annarri þeirra var fullyrt að ummælin hefðu fallið í grýttan jarðveg og var þá væntanlega verið að vísa í jarðveginn á Melunum í Vesturbæ Reykjavíkur. Í hinni var fullyrt að þeir félagar (eða Akademían eins og þeir kalla sig að mati fyrirsagnarhöfundar) væru æfir.
Eins og menn geta rifjað upp hér á síðunni benti ég á að ef menntastofnanir á landsbyggðinni muni ekki treysta sér í sameiningar eða samstarf við HÍ muni þurfa að veita fjármagni til þeirra á eigin forsendum fremur en að ríkið setji slíkt samstarf sem skilyrði fyrir fjárveitingum. Þetta mætti kalla að benda á hið augljósa.
Það nægði þó ráðherranum fyrrverandi og þremur facebook vinum hans til að verða „æfir“, svo vitnað sé í fréttina, og senda frá sér furðulegar yfirlýsingar á borð við að þetta fæli í sér hótanir í garð HÍ og minnti á stjórnarfar í alræðisríkjum!”
Með hinu síðastnefnda hjólar forsætisráðherra í Eirík Rögnvaldsson íslenskuprófessor við HÍ en hann hefur spurt hvort ummæli SDG spegli fremur ástand í alræðisríkjum.
Þannig heldur forsætisráðherra áfram: “Ef starfsemi er færð af landsbyggðinni til Reykjavíkur er það kallað eðlileg eða óhjákvæmileg þróun. Ef stutt er við starfsemi á landsbyggðinni kallast það alræðistilburðir.
Það væri vart hægt að finna betri áminningu um mikilvægi þess að standa vörð um menntun á landsbyggðinni en þessi viðhorf og ofsafengnu viðbrögð við einfaldri ábendingu um mikilvægi þess að efla menntun um allt land. Viðhorfið virðist vera það að landsbyggðarfólk eigi bara að sjá um að veiða fisk og skila svo tekjunum í tvö póstnúmer í Reykjavík.
Ríkisstjórnin hefur stutt við bakið á HÍ og einnig aukið framlög til vísinda og rannsóknarstarfa meira en dæmi eru um. Yfirgnæfandi hluti þeirra framlaga hefur farið á höfuðborgarsvæðið. Við munum áfram styðja við Háskóla Íslands og aðrar menntastofnanir í Reykjavík. En það veitir ekki af því að styðja líka við bakið á menntun utan höfuðborgarinnar og ég vona að það raski ekki ró fjórmenninganna í „Akademíunni“ enn frekar ef ég bendi á að það sama á við um heilbrigðismál, samgöngumál, stjórnsýslu og jafnvel fleira.”
Athygli vekur að forsætisráðherra setur gæsalappir utan um akademíuna. Hann skrifar áfram:
“Það er fráleitt að stilla málum þannig upp að allt það fjármagn sem sett er í menntastofnanir eða aðra innviði á landsbyggðinni sé tekið af þeim sem starfa í 101 Reykjavík. Uppbygging á landsbyggðinni gagnast Reykjavík og öfugt. Ísland er eitt land og það er stærra en Melarnir í Vesturbænum,” skrifar Sigmundur Davíð.
Sigmundur Davíð hefur ekki svarað fyrirspurn Hringbrautar þar sem m.a. hefur verið leitað svara við þeirri spurningu hvort ráðherra hafi með ummælum sínum vegið að akademísku frelsi HÍ. Stutt er síðan forsætisráðherra tók harðan slag við Kára Stefánsson. Ein afleiðing þess er að tæplega 80.000 manns hafa skrifað undir áskorun um betra heilbrigðiskerfi.
Sigmundur Davíð er fyrsti þingmaður NA-kjördæmis fyrir Framsóknarflokkinn.
