Ljóst er hverjir muni gegna formennsku í fjórum af átta nefndum þingsins en stjórnarandstaðan hefur harðlega deilt á meirihlutann sem hún segir taka sér of mörg formannssæti með minnsta mögulega þingmeirihluta. Fjórir nefndarfundir voru haldnir í morgun og þar var ákveðið hverjir verða formenn.
Frá Sjálfstæðisflokknum verða þingmennirnir Haraldur Benediktsson, formaður fjárlaganefndar og Óli Björn Kárason, formaður efnahags- og viðskiptanefndar. Valgerður Gunnarsdóttir var kjörin formaður umhverfis- og samgöngunefndar.
Nichole Leigh Mosty, þingmaður Bjartrar framtíðar, verður formaður velferðarnefndar Alþingis en það vekur athygli að búist var við því að stjórnarandstaðan myndi skipa formann þeirrar nefndar en á síðasta kjörtímabili hafði Samfylkingin formann nefndarinnar.
Á síðasta kjörtímabili var stjórnarandstaðan með formennsku í bæði velferðarnefnd og stjórnskipunar- og eftirlitsnefnd. Birgir Ármannsson sagði við mbl.is að það væri ekki útilokað að stjórnarflokkarnir myndu manna allar átta formannsstöðurnar.
