Eins og fram kom í fréttum RÚV í gærkvöld er vaxandi þrýstingur á stjórnvöldum að taka á móti fleiri en 50 flóttamönnum til landsins vegna alvarlegs ástands í flóttamannamálum. Þetta á við um stjórnmálamenn jafnt sem almenning á samfélagsmiðlum.
Sigmundur Davíð boðar nú aðgerðir: \"Ég geri ráð fyrir að á ríkisstjórnarfundi á þriðjudaginn muni ég leggja til að stofnuð verði sérstök ráðherranefnsd um þennan vanda og henni falið að meta hvernig Íslendingar geti brugðist best við, hvernig við getum lagt mest af mörkum til þess að aðstoða,“ sagði hann á RÚV í gærkvöld.
Þar verður meðal annars skoðað hvort tekið verði á móti fleiri flóttamönnum: \"Við höfum haft það að markmiði að láta gott af okkur leiða á sem flestum sviðum alþjóðamálanna og þetta er eitt af þeim sem er hvað mest aðkallandi núna,“ segir Sigmundur Davíð.
Hann vill ekki nefna hversu margir eigi að koma hingað, en telur þó óraunhæft að bjóða 5.000 manns að koma hingað eins og handhafar síðu á Facebook hafa skorað á stjórnvöld að gera: \"Ég held að það sé samstaða um að við eigum að gera meira til að bregðast við vandanum, við þurfum bara að finna út úr því hvernig við gerum það best,“ sagði forsætisráðherra á RÚV í gærkvöld.
