Nærri 60% þeirra sem biðja Umboðsmann skuldara um styrk til að leggja fram gjaldþrotabeiðni er hafnað um aðstoð. Þetta er reynslan frá því lög um opinbera aðstoð við gjaldþrotameðferð einstaklinga voru sett fyrir ári.
Forsaga málsins er sú að eftir hrun var fyrningafresti gjaldþrota einstaklinga breytt þannig að gjaldþrot fyrnast á tveimur árum í stað fjögurra ára. Langflestir skuldugir einstaklingar fá hins vegar á sig árangurslaust fjárnám sem þýðir að kröfuhafar hafa möguleika á því að halda innheimtu á kröfum áfram mjög lengi, jafnvel í mörg ár. Kostnaður við að leggja fram gjaldþrotabeiðni til Héraðsdómstóla er um 250 þúsund krónur og þann 1. febrúar 2014, setti Alþingi lög um að Umboðsmaður skuldara gæti styrkt fólk um þann kostnað, gegn ákveðnum skilyrðum.
Í svari sem Umboðsmaður skuldara sendi við spurningu lesanda á upplýsingaveitunni spyr.is kemur fram að frá því að lögin tóku gildi hafi 498 manns sótt um styrkinn. Af þessum umsóknum hafi 422 umsóknir verið yfirfarnar og 178 umsóknir samþykktar. Þetta þýðir að 58% umsækjenda fá synjun. Í svarinu kemur einnig fram að í flestum tilfellum byggir synjun á því að lántakendur hafa ekki leitað annarra úrræða. Hægt er að skoða svarið nánar á spyr.is.
