Lilja Alfreðsdóttir, mennta- og menningarmálaráðherra, kynnti frumvarp um opinberan fjárstuðning við öflun og miðlun frétta og fréttatengds efnis á fundi í dag. Áætlað er að leggja frumvarpið fram á vorþingi en frumvarpsdrögin má nú finna í samráðsgátt stjórnvalda, þar sem fólk getur sent inn umsagnir og ábendingar.
„Hér á landi hefur ríkið ekki veitt fjölmiðlum beinan stuðning eins og lengi hefur verið gert annars staðar á Norðurlöndunum og víðar í Norður-Evrópu. Fjölbreyttir og traustir fjölmiðlar eru mikilvægir fyrir lýðræðið á hverjum tíma og fyrir okkur Íslendinga er hlutverk þeirra einnig sérlega brýnt þegar kemur að íslenskri tungu og menningu. Okkar fyrsta úrlausnarefni er að styrkja rekstrarumhverfi einkarekinna fjölmiðla og ég fagna því að geta í dag kynnt frumvarpsdrög sem ég tel að muni stuðla að öflugri fjölmiðlun hér á landi,“ segir Lilja.
Fram kemur í fréttatilkynningu frá mennta- og menningarmálaráðuneytinu að við samningu frumvarpsins hafi m.a. verið byggt á skýrslu nefndar um rekstrarumhverfi einkarekinna fjölmiðla, greinargerð fjölmiðlanefndar um sama efni, hagrænni skoðun á rekstrarumhverfi einkarekinna fjölmiðla hér á landiog yfirgripsmikilli greiningarvinnu sem unnin var í samstarfi við sérfræðinga á sviði fjölmiðla.
Frumvarpið sækir að hluta fyrirmynd í sambærilega löggjöf á hinum Norðurlöndunum, einkum Danmerkur og Noregs um opinberan stuðning og ívilnanir til einkarekinna fjölmiðla. Við samningun frumvarpsins var einnig höfð hliðsjón af íslenskri löggjöf um tímabundnar endurgreiðslur og stuðning á afmörkuðum sviðum.
Meginefni frumvarpsdraganna er sem hér segir:
- Komið verði á fót nýju stuðningskerfi fyrir einkarekna fjölmiðla hér á landi vegna kostnaðar sem fellur til við miðlun frétta, fréttatengds efnis og umfjöllunar um samfélagsleg málefni. Styrkirnir verði í formi endurgreiðslu á allt að 25 prósent af hluta ritstjórnarkostnaðar.
- Hámarksfjárhæð stuðnings til hvers umsækjanda verði 50 milljónir kr. á ári.
- Mögulegt verði að veita staðbundnum miðlum viðbótarendurgreiðslu.
- Ráðgert er að framlag ríkisins nemi 300-400 milljónum kr. á ári.
Lagt er til að lögin taki gildi 1. janúar 2020 og að endurgreiðslur miðist við rekstrarárið 2019.
