Engimn regla virðist vera um hvort og hvað ríkisstarfsmenn fá í jólagjöf frá þeim stofnunum sem þeir starfa hjá; sumir fá hvorki gjöf né boð á jólahlaðborð á meðan aðrir þiggja ókeypis veislur og fá forláta gjafir að andvirði tuga þúsunda.
Þetta kemur fram í umfjöllun Fréttablaðsins síðustu daga, en fyrr í vikunni sýndi blaðið fram á að stofnanir á borð við Matís gera sélega vel við starfsmenn sína, en þeir fengu ekki einasta boð í jólaveislu í lok síðasta árs sem kostaði röskar 17 þúsund krónur heldur og gjöf frá vinnustað sínum að andvirði ríflega 30 þúsunda króna. Aðrar stofnananir sem eru svona örlátar við starfsmenn sína eru til dæmis Einkaleyfastofan, Sýslumaðurinn á Suðurnesjum, Fjölmiðlanefnd, Skattrannsóknarstjóri, Yfirskattanefnd og Byggðastofnun, en Fréttablaðið birti í vikunni lista yfir þessar og vel á annan tug annarra stofnana sem gefa jólagafir fyrir minnst 15 þúsund krónur og bjóða starfsmönnum til veislu fyrir 10 þúsund krónur eða meira.
Aðrir fá ekkert, hvorki gjöf né veislu - og borga að því er virðist í flestum tilvikum gjafir og veislurnar sjálfir. Svo er um starfsfólk framhaldsskólanna sem Fréttablaðið tekur tali í dag, en á þessum vinnustöðum eru einfaldlega ekki til afgangs fjármunir til að gleðja starfsmenn. Skólameistari MA segist raunar vera miður sín að vera spurður að þessu.
Svörin í öðrum skólum eru álíka, engar gjafir, engin boð og hafa ekki tíðkast síðustu árin sakir fjársveltis.
Það er því ljóst að misjafnlega er gefið á garðann hjá ríkinu. Þannig ver Matís 4 milljónum í jólagjafir til starfsmanna, en framhaldsskólarnir eiga ekki þann pening og hafa ekki átt lengi.
