Ragnar Þór Ingólfsson, formaður VR, átti von á mótframboði þegar kjörtímabil hans rann sitt skeið. Þar sem það kom ekki var hann sjálfkjörinn til áframhaldandi setu og telur það merki um ákall eftir róttækari tón. Kjarninn greinir frá.
„Já ég átti von á mótframboði, allavega miðað við hvernig orðræðan hefur verið í kringum bæði mig og embættið. En svo var ekki og ég tek því þannig að sjálfsögðu að það séu ekki gerðar frekari athugasemdir við mín störf, allavega ekki af mínum félagsmönnum. Þessi tónn sem er að breytast í hreyfingunni er þessi tónn sem ég var að kalla eftir þegar ég var í stjórn VR. Það sýnir sig bara á þeim breytingum sem orðið hafa innan verkalýðshreyfingarinnar að það er verið að kalla eftir nýjum róttækari tón frá verkalýðshreyfingunni.“
Þetta sagði Ragnar Þór Ingólfsson, formaður VR, í viðtali við Þórð Snæ Júlíusson, ritstjóra Kjarnans, í frétta- og umræðuþættinum 21 á Hringbraut á miðvikudagskvöld.
Ragnar Þór segir margt í samfélaginu hafa orsakað það að eftirspurn sé eftir þessum róttækari tón. „Við vitum hvernig fjármálakerfið og fjármálaöflin hafa nánast valtað yfir almenning, ekki bara í aðdraganda hrunsins heldur líka í eftirmálum þess.“
Hann telur það nauðsynlegt fyrir fólk að finna að það hafi sterkan málsvara til að takast á við slíka stöðu. „Nú hefur verkalýðshreyfingin gríðarlega mikinn og öflugan fjárhagslegan slagkraft og mikla og sterka tengingu inn í lífeyrissjóðakerfið og við eigum að sjálfsögðu að láta til okkar taka þegar kemur að því að taka á málum sem snúa að hagsmunum sem vinna gegn okkur.“
Viðtalið við Ragnar Þór í heild sinni er að finna hér:
